uMthunywa
Thokozile Mbedzi
KULOJAHA oleminyaka engu-19 yokuzalwa weSidakeni ngaphansi kwenduna uNtabeni eZhombe ogwaze omunye oleminyaka engu-19 wafa emethesa icala lokutshontsha impahla zakhe.
Kubikwa mhlaka 1 Mpalakazi, umetheswacala uZivanai Maphosa walanda uConfidence Mpofu owayelomngane wakhe wafika wamethesa icala lokutshontsha izigqoko zakhe okwenza umsindo wathi phothololo.
Kuvele ukuba uMaphosa wathi elokhu ephoselana amazwi loMpofu wakhipha ingqamu esikhwameni wamgwaza ngayo kanye esifubeni esandleni senxele andubana acele ezinyaweni. Ekhuluma lentatheli kaMthunywa uNkosazana Soneni Dube uthe babone into yamehlo abafana laba bebanga impahla ezitshontshiweyo.
“UZivanai wahlangana loConfidence elomngane wakhe waqalisa umsindo ethi ufuna impahla zakhe azitshontshileyo. Khonokho umngane wakhona esamangele ukuthi kwenzakalani, uZivanai uhwatshe ingqamu wahle wayithela esifubeni esandleni sokunxele wahle wafa,” kutsho uNkszn Dube.
Isikhulumi samapholisa eMidlands, uAssistant uFungai Ngawagare ebuzwa ngodaba lolu uvumile wathi solufikile ehofisini yabo.
“Siphenyisisa udaba lwendoda (19) egwaze eyinye kubangwa impahla ezitshontshiweyo. Sikhuthaza abantu ukuthi batshiye umkhuba wodlame nxa bexazulula inkinga.
“Umetheswacala lokhu engakabotshwa, sicela abangabe besazi ukuthi ungaphi bazise amapholisa aseduzane labo,” kuphetha uAsst Insp Ngawagare.
