uMthunywa
YiNtatheli kaMthunywa
KULOMNTWANA welokitshini leCowdray Park koBulawayo ofunda uGiredi 2 obangwa lezibi kulandela ukubhaxabulwa ngezigodo yizakhamizi zimethesa icala lokutshontsha inkwilimba lembila.
Umntwana lo ofunda esikolo seTategulu Primary kubikwa wehlelwe ngamashwa la ngoMvulo kuyonale iviki.
Ekhuluma lentatheli kaMthunywa umfakazi ongathandanga ukubethwa ngegama uthe lanxa umntwana lo ubephambanisile bekungamelanga abantu abadala bamtshaye ngendlela abamtshaya ngayo.
“Kubuhlungu lokhu okwenziwe emntwaneni lo. Ubephambanisile yebo kodwa bekumele kube lezinye indlela aqondiswa ngazo, hatshi ukutshaywa angathi ngumuntu omdala.
“Umntwana okuGiredi 2 atshaywe angathi lisela elikhulu. Phela bebemtshaya ngezigodo abanye bemjikijela ngamatshe.
Ulimele hatshi mbijana, ngilethemba lokuthi bamusa esibhedlela ngoba nxa bengamhambisanga singakhuluma okunye,” kulandisa umfakazi lo.
Uqhubeke esithi abesikolo lapho afunda khona yibo abancedayo ngokufika abantu bahle bekela ukumtshaya.
“Abesikolo lapho afunda khona yibo abafika bamlamulela ngokumthatha. Kungayisibo umntwana lo wayezacina efile,” kuchaza umfakazi lo.
Omunye umbalisi ofundisa esikolo seTategulu Primary ongathandanga ukuvezwa ngoba engavunyelwa ukukhuluma lentatheli uvumile ukuthi kulomfundi owaphosa wabulawa ngabantu ngoba etshontshe inkwilimba.
“Abantu ababetshaya umntwana lo onguGiredi 2 bangimangalisa kakhulu ngoba babemtshaya ngezigodo abanye bemkhanda ngamatshe yena esethe daca phansi engasabiseli. Wayengasakhangeleki esgcwele igazi esebomvu gebhu ebusweni.
“Abantu kumele bekele ukuhlukuluza abantwana ngoba lokhu ababekwenza yikuhlukuluza umntwana okusegcekeni sibili,” kuchaza umbalisi lo.
Isikhulumi samapholisa akoBulawayo uChief Inspector Precious Simango ubike ukuthi baluzwile udaba lolu njalo umntwana lo ubelaywa yilaba abatshontsheleyo kodwa abomthetho lokhe belukhangelisisa udaba lolu.
