uMthunywa
Ethel Ncube
UMLOBI osezakhele udumo ngokuloba ingwalo zakhe ezikhipha ebulenjini usekhiphe njalo olunye olulesihloko esithi Umjibila kababa.
Umlobi wengwalo zesiNdebele lo, uMlungisi Gasa odabuka eNkayi uselengwalo ezingu-22 asezikhuphe ebulenjini leziyisithupha ezadindwayo.
Ugwalo lwakhe oluthi Umjibila kababa ulukhiphe ekuqaleni kwayonale inyanga njalo lukhuluma ngemvelo kunye langendlela abantu abaphila ngayo.
Umlobi lo uveze ukuthi ukuloba yinto ayithakazelelayo kakhulu futhi lapho akhululeka ukuba aveze umbono wakhe ngezinto ezitshiyeneyo ezenzakala empilweni.
“Ulimi lugcineka ngcono nxa lulotshiwe.
“Akulula ukuthi lutshabalale, mina ngilengwalo engaziloba ebulenjini kusukela ngomnyaka ka-2016 lezinye ezidindiweyo eziyisithupha ezibalisa ezithi Zodwa Mntanami oluka-2019, Ilifa lami oluka-2020, Impi yekhaya (2021), Umthakathi usekhaya (2022), Liphutha likamama (2023) kuthi elokucina-ke eliphume khathesi ngelithi uMjibila kababa.
“Ingwalo zami ezinengi zikhuluma ngemvelo kanye lezehlakalo zempilo esihlangana lazo lobunzima bokuba yintandane ungelabazali emhlabeni.
“Mina ngalahlekelwa ngabazali bami bonke mnyaka munye lokhu ngokunye okuthola engwalweni zami,” kubika uGasa.
Uqhubekele phambili eveza ukuba ibhuku lakhe seliphumile njalo abalandeli bakhe abaludinge balufunde bakholise ulimi olubhalwe ngobungcitshi.
“Ugwalo oluthi uMjibila kababa ludindwe eMzansi kuyonale inyanga njalo luyatholakala eMzansi laseZimbabwe.
“Okokucina ngithanda ukukhuthaza labo abathanda ingwalo zami ukuthi baqhubeke bengisekela,” kuphetha uGasa.
