uMthunywa
Samkelo Tshuma
IQEMBU leNdolwane Super Sounds elikhokhelwa nguMartin Sibanda lizadibana enkundleni lomhlabeleli weSouth Africa olodumo uFreddy Gwala baphakulele abalandeli bakuleli ukudla kwendlebe lamehlo eHillbrow Theatre ngempelaviki.
Oqoqe umcimbi lo uOliver Mambambamba uveze ukuthi besekulesikhathi eside abalandeli bomculo weNdolwane kweleSouth Africa besithi bazodlala.
“Iqembu leNdolwane liya phinda abalandeli balo umphehlo eHillbrow njalo ngilethemba lokuthi bazakholisa ngoba sebelungiselele baphelela umcimbi lo,” kutsho uOliver Mambambamba.
Ubuye waveza ukuthi iqembu leli lizaxhaswa yintshantshu kwezokucula uFreddy Gwala, ngakho abalandeli balumculo baze ngobunengi babo ngoba kunengi okuzabajabulisa.
UMthunywa uxhumane loFreddy Gwala mayelana laloludaba wabika ukuthi uzancedisa iNdolwane ekuhlabeleni njalo bayaqala ukuthi basebenze bonke kwezomculo.
“Sizabe sindawonye ngempelaviki leqembu leNdolwane elikhokhelwa nguMartin Sibanda, ngiyaqala ukuthi ngisebenze labo” kutsho uGwala.
UMartin uzaqala adlale mhlaka 24 Mpandula ku-Intwasa emini eNgwebu Stand ngemva kwalokhu sebebhekisa amabombo eSouth Africa.
Umkhosi we-Intwasa uqale ngoMvulo uzagqitshwa ngoMgqibelo njalo bekubukiswa imidlalo, kusethulwa izingwalo, kusenziwa lemicimbi etshiyeneyo.
