uMthunywa
Nontobeko Sibanda
ZISELE zitshe amathe izakhamizi zeFort Rixon ngokuzwa ngokubulawa kwendoda eleminyaka engu-46 yokuzalwa, liqula labafana ngoba ikhuze omunye wabo.
Umufi uReadman Ndlovu ubehlala esiqintini seKhombo, Village 10, eFort Rixon. Kucatshangelwa ukuthi uMethod Mthembo, Nkosi Mafu lo-Anorld Sibanda bathi sebedale icala leli babaleka. Omunye wabo ngumfana oleminyaka engu-17.
Ongumsekeli wesikhulumi samapholisa esabelweni seMatabeleland South u-Assistant Inspector Thandolwenkosi Moyo uthe udaba baluphethe njalo basadingisisa ngesehlakalo lesi.
“Udaba siluphethe. Kwenzakale mhlaka 27 Nkwenkwezi ngehola letshumi ebusuku ezitolo zeKhombo eFort Rixon. Umufi nguReadman Ndlovu oleminyaka engu 46 yokuzalwa,” kutsho u-Asst Insp Moyo.
“Abasolwa bebenatha ezitolo zeKhombo eFort Rixon lapho umufi akhuza khona umfana oleminyaka engu 17 ukuthi kungani enatha utshwala ngoba engaphansi kweminyaka engu-18.
Omunye wabasolwa wathatha ingqamu esetshenziswa emnkulwini wagwaza ngayo umufi embanjeni emhlubulweni wenxele wahle wedlula emhlabeni.
U-Asst Insp Moyo uqhubeke wathi: “Umsolwa oleminyaka engu-17 yokuzalwa ubotshiwe kukanti abanye babaleka. Amapholisa acela ukuncediswa ngumphakathi ukulonda umkhondo yemigulukudu emithathu le ukuze iphendule imibizo yamapholisa,” kutsho u-Ass Insp Moyo.
“Sikhuthaza uzulu ukuthi angasebenzisi udlame ekuxazululeni ingxabano.”
