uMthunywa
Thokozile Mbedzi
ZlLOKHE zinkemile izakhamizi zepulazini leLyons, eRedcliff eKwekwe kulandela ukuzwa ngezelamani ezibulele enye indoda kwesinye isitolo besola ukuthi isihlobo sayo sikhulelise umntakadadewabo.
UBukhosi Moyo oleminyaka engu-18 yokuzalwa ufe kulandela ukuganyulwa ekhanda nguSifelumusa Muchiya (29) loJabulani Muchiya.
UMthunywa uzwe ukuthi mhlaka 7 Lwezi uBukhosi wayezinathela utshwala eLyons tuckshop loNorman Moyo, uSifelumusa Muchiya kunye loJabulani Muchiya baqala ukuxabana loNorman bethi isihlobo sakhe sikhulelise umntakadadewabo.
Ababili laba baqala ukumkhanda ngamatshe ngapha bemhlahlela ngehloka. Kubikwa uBukhosi ebona ukuthi umngane wakhe usesengozini wazama ukuvikela uNorman, bahle bamphendukela bamhlahlela ngehloka ekhanda wathi daca phansi. USifelumusa kunye loJabulani kubikwa bafulathela bahamba bamtshiya esopha.
Amapholisa abizwa afika achwayisisa andubana ababili uBukhosi loNorman bathwalelwe esibhedlela seKwekwe District Hospital lapho abafika belatshwa bakhitshwa.
Kubikwa uBukhosi kwamqinela wahanjiswa esibhedlela seSilobela lapho acina edluliselwa esibhedlela seUnited Bulawayo Hospital lapho abhubhela khona.
United Bulawayo Hospital
Isikhulumi samapholisa eMidlands uInspector Emmanuel Mahoko uthe uSifelumusa usesezandleni zamapholisa kukanti uJabulani ulokhu esadingwa.
“Sicela ongabe elolwazi lokuthi uJabulani Muchiya ungaphi abikele amapholisa aseduzane laye.
“Sixwayisa uzulu ukuba kabaxhwayane lodlame ekuxazululeni ingxabano. Sikhuthaza abantu ukuba nxa bengazwanani kabazame ukudinga ezinye indlela zokukhumisana umlotha,” kuphetha uInsp Mahoko.
