uMthunywa
Ethel Ncube
AKUQILI lazikhotha emhlane. Isaga lesi sigcwaliswe ngelinye isela lenkomo eleGuyu eGwanda elibanjwe litshontsha imbuzi abalibambileyo bathi liyidle ingaphekwanga. Lokhe kwenzakale emavikini asanda kudlula lapho umetheswacala uRich Malinga etshontshe imbuzi wayihlinza wabanjwa yizakhamizi ezihambe laye enkambeni lapho abafike bathi kayidle imbuzi ayitshontshileyo ingaphekwanga.
Imbuzi
UMthunywa uxhumane lesinye isakhamuzi sakule ndawo uMnumzana Bean Nare oveze ukuba lokho kwenzakele.
“Umuntu lo wathatha imbuzi wayinhlinza ethi kabonwa muntu kanti bakhona abakhangeleyo. Wabanjwa yizakhamizi zamusa emapholiseni abadala bafika bathi kayidle injalo inyama ingaphekwanga ukuze acine ubusela. URich laye ngokwesaba wazama ukuyidla iluhlaza kwaze kwalamula amapholisa.
“Amasela wonke esiwabambayo sizawafundisa isifundo ngoba singeke sifuye singekela ukuqinisa umthetho wokuzincedisa ukubamba amasela siyizakhamizi,” kubika uMnu Nare.
Ekhuluma lentatheli omunye wabahlali bakule indawo uMnumzana Tebogo Dube uveze ukuba amasela kumele aqondiswe.
Ubabhemi
“Lo owadliswa inyama injalo kaphindi futhi engaphuma ejele ubusela uyabutshiya sibili. Sesizwile ngamasela imbuzi inkomo obabhemi konke bayakutshontsha pho sifuyele ngaphi.
“Inyama kwathiwa kayidle lathi sikhangele wayizama lapha wakhupha amehlo phandle kwabaluthuli, lokhu kuyisifundo kwabanye abatshontshayo lapho.
Iphephandaba likazulu lehluleke ukuxhumana lesikhulumi samapholisa eMatabeleland South.
