uMthunywa
Yintatheli kaMthunywa
“Akusamelanga ngithole umsebenzi yini mina? Abantu abangiqonde, bezwe iqiniso kimi. Akumelanga bahlebe ngami . . .”
Uzonde ugane unwabu umqeqetshi omutsha weqembu leGreenfuel uBekithemba “Super” Ndlovu kulandela ukumemetheka kwembiko ethi wakhuluma kubi, waphinda wathengisa umqeqetshi uLloyd Mutasa.
Premier Soccer League
Andubana aphiwe isikhundla esitsha, uNdlovu ubengumsekeli kaMutasa, yena osekhutshulwe waba ngumqondisi wokuqeqetsha kuleliqembu.
Amahungahunga “okungezwani” phakathi kukaNdlovu loMutasa asabalale okuzwayo ngeviki edluleyo, lapho okubikwa kulabaqeqetshi labasekeli bomdlalo thize kuleli abakade bekhuluma okungayisikho.
Bekuthiwa uNdlovu waphiwa umsebenzi ngoba ethengise uMutasa.
Ekhuluma lomsakazo weZimpapers Television Network, iZTN Prime (DSTV Channel 294), uNdlovu uthe abantu abayekele amanga.
Uthe ubudlelwano bakhe loMutasa buqinile njalo uyazibuza ukuthi kungani kulabantu abafuna ukubaxabanisa.
UNdlovu, owake waqeqetsha iHighlanders leBulawayo City uthe ulenhlonipho enkulu kuMutasa ngoba usefunde okunengi kuye.
“ULloyd Mutasa ngifunda kuye umdlalo. Ngesikhathi esifitshane ngisebenza laye, sengifunde okunengi. Ulolwazi olunengi engiluthaphayo. Ngumqeqetshi wami, uyangiqeqetsha, lami ngiqeqetsha iqembu,” kutsho uNdlovu.
