uMthunywa
Thokozile Mbedzi
ZILOKHU zikhuza umhlola izakhamizi zesigabeni seMarinowa, eMaphisa ngemva kokuba omunye ujaha egwaze umngane wakhe esifubeni wafa kubangwa intombi ngeviki ephelileyo.
Kubikwa abababili laba abathi umsolwa uPardon Ndlovu oleminyaka engu-25 yokuzalwa loBrighton Zimuto oleminyaka engu-24 bebengabangange kodwa ubudlelwano babo bebungasebuhle nanko phela besekubangwa intombi okwabangela ukuthi badindane baze balanyulwa ngomunye umngane wabo mhlaka 9 kuyonale inyanga abantu bathi kumbe sokuphelile kukanti hatshi.
Ekhuluma lentatheli kaMthunywa omunye walabo ababekhona kusenzakala inkemenkeme le uMnumzana Nkosilathi Phakathi uveze ukuthi balokhu bemangele ngendlela ababili laba abahlaselane ngayo ngoba besebeke balwa kodwa balanyulwa abantu bazitshela ukuthi sokuphelile kanti lokhu bebophelene umoya.
“Silokhu silesithuli ngendlela amajaha la abulalana ngayo ngoba bake balwa kodwa balanyulwa, sasizitshela ukuthi sokuphelile kukanti hatshi lokhe bebambelane isikhwili. “Lokhe ngathwetshulwa yingwe angikaze ngilibone igazi eliphuma ngendlela leyana lingani livulwa empompini. Iqiniso uPardon ungumbulali ngoba indlela akhuphe ngayo ingqamu eyithela esifubeni sikaBrighton wonke umuntu ulokhe elesithuli.
“UBrighton uthe esegwaziwe wazama ukuhamba okungumango kodwa kwehlula wawa umphefumulo wakhe wahle waphelela khonapho.
“Okwenzakale lapho kusiqede amandla nanko phela asikaze sibone umuntu ebulawa, ngempela abantwana sebelesibindi. Okwenziwe ngumsolwa kusidabule inhliziyo njengesigaba,” kutsho uMnu Phakathi.
Omele isikhulumi samapholisa esabelweni seMatabeleland South uSeargent Stanford Mguni ebuzwa ngodaba lolu uvumile wathi solufikile kibo.
“Indaba yamadoda agwazane eMaphisa isifikile kithi lapha njalo sithanda ukuthi kuyadabukisa ukuzwa ngokubulalana kwabantu ngalindlela.
“Sihlala siqonqosela ukuthi abantu bangahambi bethwele izikhali ngoba zilakho ukubangela ukufa. Siyaphinda njalo, abantu kabekele ukuhamba bethwele izikhali ngoba lokhu kungabangela ukuthi badale amacala.
“Sixwayisa njalo ukuthi nxa abantu belokungezwani badinge ukucetshiswa ngoba ingxabano zilakho ukubangela ukufa.
“Ngabe amajaha la adinga abacebisi mhlawumbe ngabe lamhla sikhuluma indaba etshiyeneyo,” kuphetha uSeargent Mguni.
