uMthunywa
YiNtatheli kaMthunywa
KULENDODA yepulazini leWoodcroft eNyamandlovu eqede abantu amandla ngemva kokubulala umkakhe amphosele phakathi komgodi kubangwa ukungathembeki emtshadweni.
UClifford Phiri oleminyaka engu-38 yokuzalwa kubikwa utshaye wabulala umkakhe mhlaka 29 Ncwabakazi, uMargaret Ndlovu ngezigodo waze wafa ngemva kokuxabana.
Kuzwakale ukuthi esembulele wamthatha wayamphosela phakathi komgodi ongasasebenziyo. Ekhuluma lentatheli kaMthunywa uMnumzana Bekithemba Moyo uthe baphelelwe njalo kuyabasinda lokhu okwenzakeleyo.
“Siphelelwe silapha siyaswela lokuthi sikuphathe sithini umuntu oba lomoya abulale unkosikazi wakhe aze ayemphosela emgodini wamanzi ongasasebenziyo.
“Lokhu kuyesabeka athi esenze njalo ayetshela abazali bomkakhe ukuthi kamboni. Kusenzakala konke lokhu esinye isakhamuzi sasiqaphele kungakho saphanga sayazisa uyise kaMargeret konke abona kusenzakala.
“Uyise wahle wayabika ukuba indodakazi yakhe kayibonakali emapholiseni eCowdray Park mhlaka 31 Ncwabakazi,” kulandisa uMnu Moyo.
Kubikwa mhlaka 9 Mpandula uyise kamuyi wangena epulazini eliseduzane wabhoda wananzelela umzila awusolayo wawulandela wamqondisa emgodini osepulazini ongasebenziyo.
“Uthe efika lapho wacabangela ukuba kungaba kuyikho okulomntanakhe ngoba besekulomnuko omubi ovela khona.
Yikho ukuyabikela amapholisa ngomzila lowo kanye lomnuko osuka emgodini. Amapholisa afica emgodini kulesidumbu esingagqokanga ebesesisonakala, lethenesi lesandleni senxele, isikipa esiluhlaza, iyembe kaPhiri elegazi, lejazi,” kuchaza uMnu Moyo.
Isikhulumi samapholisa akoBulawayo uInspector Abedinico Ncube ebuzwa ngodaba lolu uthe solufikile ehofisini yabo njalo bazaluchwayisisa.
“Njengamapholisa sicela uzulu asiphathise kubotshwe uClifford Phiri odingwa ngamapholisa esetheswa icala lokubulala athandana laye emethesa icala lokungathembeki,” kuphetha ulnsp Ncube.
