uMthunywa
YiNtatheli kaMthunywa
IZIBULO leNduna UKhayisa Ndiweni, uMnumzana Joram Thambo Ndiweni, utshele osobhuku beNtabazinduna ukuthi usezavusela umuzi wakubo ngenjongo yokulungisela ukuza kwakhe ezothatha isikhundla sobukhosi.
UJoram, ohlala e-United Kingdom, ukhulume lokhu esecingweni emhlanganweni wakhe lenkokheli owenzelwe eNtabazinduna Hall ngoMgqibelo. Lokhu kuza ngesikhathi uJoram engaboni ngaso linye lenye indoda eqanjwe ngokuthi nguMnumzana Masuka owendawo ebizwa ngokuthi koJabulani, mayelana lokungcolisa kwakhe ithuna likaNkosikazi Agnes Masuku Ndiweni, owayengunkosikazi weNduna uKhayisa.
UKhayisa Ndiweni. Umfanekiso uthethwe ku Nehanda radio
UNkosikazi Ndiweni udlule emhlabeni ngo-2020.
Ubukhosi bobukhokheli bakoNdiweni eNtabazinduna buyaphikiswana nanko uJoram waphikisa ukugcotshwa komnewabo uMnumzana Nhlanhlayamangwe Felix Ndiweni ngomnyaka ka2019. UFelix, indodana yesibili yeNduna uKhayisa, ongasekho emhlabeni, wasuswa esikhundleni sobukhokheli ngemva kokuthi isikhundla sakhe kuthiwa sasiphambene lesiko lamaNguni.
Inkokheli zomdabu eNtabazinduna zivumile ukuba uJoram ngumkhokheli wazo, kodwa zaveza ukungaphatheki kuhle embangweni wobuduna endaweni yabo. UJoram, ekhuluma ese-UK uthe usezilungiselela ukuphenduka eZimbabwe.
“Ukukhuluma ngokubuya kwami kuyinto engavumelekanga. Ngiyingane yemuli, njenga wonke umuntu. Ngisebenzela imuli yami njengabo bonke abantu. Ngizafika nxa isikhathi sesilungile.
“Abantu bakithi bathi nxa ungakaze ukhokhele owakho umuzi ungakhokhela kanjani abantu? Impendulo yami kulokho yikuthi le yindaba yesiko futhi ngizazixazulula inkinga ezihlupha imuli yami, futhi sengisondele ekukwenzeni lokho,” kutsho uMnu Joram Ndiweni.
“Uyabona, indodana kadadewethu isivele isisakha kakutsha umuzi wangakithi, lokho kumele kutshengisele ukuthi sengizabuyela ekhaya,” kutsho yena.
uMnumnzana Ndiweni
Mnu Ndiweni uthe ukubuya kwakhe kwavinjelwa yikonakala komuzi wakoNdiweni asewulungisa khathesi.
“Ngizabuya ngibe labantu bami futhi ngizalima njengabantu bonke. Umuzi wethu wawusubhidlika, uphahla soluwela phakathi, abantu bekhona babezihlalele nje njengoba kwakunjalo.
“Kudingeka ukuthi ngiqale phansi futhi. Kuqakathekile ukuthi abantu bakunanzelele ukuthi nxa umuzi wakoNdiweni ubhubha, iNtabazinduna iyabhubha. Lokhu kungenxa yokuthi lelo kwakulikhaya lomuntu wonke futhi lapho abantu belambile, babesazi ukuthi baqoqoda emnyango wethu. Ngifuna kuphinde kube njalo ngoba umuzi wakoNdiweni akumelanga kubelikhaya lapho okwamukelwa khona ixuku elithile labantu.”
UMnu Ndiweni uphinde waveza ukuthi ngenxa yesenzo sikaMnu Masuka, umbuso wakoNdiweni usengozini.
“Umama wedlula emhlabeni eMatsheumhlope koBulawayo. Lokhu kukodwa kwakuyinto embi kumuli yethu. Indoda eyayikhona kwakunguMasuka bacina sebebhala incwadi ebizwa ngokuthi yi-will, into yesilungu engajwayelekanga kithi.
“Lokhu kwenziwa ngamabomo futhi kuyinto embi. Manje sekumele silwele ubuzibulo bethu, konke lokhu kungenxa yempi eyaqalwa nguMasuka.”
UMnu Ndiweni uthe izakhamizi kumele zikhuze uMnu Masuka.
“Izakhamizi lenkokheli kumele zimkhuze ngoba njengabantu beNtabazinduna lamaNdebele silamasiko ethu okumele alandelwe.
“Njengenkokheli zakithi, ngilinika ilungelo lokukhuza abantu. Lokhu esikubona kusenziwa khathesi akumelanga kuphinde kwenzeke,” kutsho uMnu Ndiweni.
Uthe uhlelo lwakhe ngolokusebenzelana loHulumende. Uthe abafuna ukulahla amasiko abaxotshwe eNtabazinduna.
“Ikhaya alifi; isiko lalo alifi futhi isiko aliyi eNgilandi. NgiseNgilandi okwamanje ngenxa yobudlelwano bami leNtabazinduna. Ngakho-ke, ngithi kini njengenkokheli ziqhenyeni ngelifa elilitshiyelwe abazali benu.
“Sikhokhela indawo le njengamadoda ndawonye. Kufanele ngihlale phansi lomuntu wonke sibelomqondo munye. Wenza njalo ubaba futhi yileyondlela lami engifuna ukuyilandela. Loba ngabe ngubani, othi ufundile kakhulu ongafuni ukulandela isiko akahambe ayedinga enye indawo lapho angenza khona umathanda.”
UMnu Ndiweni uthe uSobhuku uMathilika kumele aphathe udaba lwendawo engaphansi kwakhe aze abuye.
“UMathilika ukhona uzaphatha zonke indaba zobukhosi ebizweni lami njalo nxa kukhona okungaphezulu kwamandla akhe, angangithinta sibone ukuthi sizayixazulula njani.
“Sizakhuluma loHulumende ukuze isikhundla sakhe sihlonitshwe ngokumthetho, athole okufanele umuntu osesikhundla sakhe. Ngizizwile zonke izikhalazo zikaMathilika. Lokho ngizakulungisa ngesikhathi esifaneleyo,” kutsho uMnu Joram Ndiweni.
