uMthunywa
Pumulani Mpofu
IBhayibhili liyaqakathekisa abazali yikho kwaba lomlayo othi, “bantwana hloniphani abazali benu ukuze insuku zenu zande emhlabeni.” Lowu umlayo uveza sobala ukubana umzali uqakathekile izikhathi zonke njalo basiletha emhlabeni besinakekele size sikhule njalo basitholele incwadi zokuzalwa ezisinika ikusasa elihle ngoba sisenelisa ukubana sifunde njalo sisebenze.
Abazali baqathekile kakhulu ngoba kuyibo abasigcinayo ngendlela enhle njalo emangalisayo. Abadala balesaga esithi: intandane enhle ngekhothwa ngunina. Inengi labantwana bandise ukubona ukuqakatheka kwabazali lapho sebethe batshona khona benanzelela ukubana abazali bazinsika zempilo.
Ezikhathini ezinengi abazali yibo abasihambisa esikolo, basidingele ukudla kanye lempahla njalo yibo abasipha amalungelo ethu okwaziwa agoqela ukusithathela incwadi zokuzalwa, isithupha kanye le-passport. Lapho abazali sebethe batshona yikhona abantwana bebona ukubana abazali yibo abaphethe impilo zethu ngendlela ephakemeyo.
Kule iviki ngithole ithuba lokuxoxisana lojaha obizwa kuthiwa ngu Sehlulo Mlotshwa ovela eMatopo. USehlulo wazalelwa ekilinika yeTshabalala kodwa wakhulela eMatopo elonina. Wakhula waze waba lijaha elileminyaka engamatshumi lamabili elokhe engelayo incwadi yokuzalwa ngoba unina wayengalaso isithupha kanye lencwadi yokuzalwa. Ukuswelakala kwencwadi yokuzalwa kukaSehlulo yikho okwadala ukubana uSehlulo acine kuGiredi 7 ngoba kungekho sikolo esivuma ukuthatha umntwana ongelayo incwadi yokuzalwa. Lokhu kwadala ukubana uSehlulo asebenze esengumfana wenkomo ngesikhathi kumele ukuthi abesesikolo. USehlulo kwamzwisa ubuhlungu wakhuthaza unina ukubana athathe incwadi yokuzalwa kanye lesithupha. UNakaSehlulo wazinikela-ke waseqala ukuncedisa uSehlulo ukubana athole incwadi yokuzalwa lesithupha ukuze enelise ukubana adinge umsebenzi njalo aziphilise njengawo wonke amajaha phandle .
Okokuqala uSehlulo waqonda koMsitheli wayathatha ama-finger prints abiza $5 ukuze kubonakale sobala ukubana kakaze athathe incwadi yokuzalwa. Emva kwalokho waqonda ekilinika lapho azalelwa khona wabhadala imali engange $4,60 ukuze bamdingele ibirth confirmation record yakhe. Njengoba ke i-health card lakhe lase lilahlekile waqonda ekilinika yeMatopo lapho ayehlatshiswa khona wacela umongikazi omkhulu wesibhedlela ukubana ambhalele incwadi etsho ukubana ikhadi lalahleka kodwa-ke wahlatshwa wonke amajekiseni okumele ahlatshwe ngabantwana.
Eseqede lapho waqonda esikolo lapho afunda khona wayathola incwadi eveza sobala ukubana ufunde engelayo incwadi yokuzalwa.Eseqedile konke waqonda koMsitheli elonina esesiya thatha incwadi yokuzalwa. Bamlungisela-ke koMsitheli bamazisa ukubana aphenduke ngemva kweviki eyodwa ukuzothatha incwadi yokuzalwa njalo azothatha lesithupha. Emva kweviki eyodwa wabuyela lakanye wayithola incwadi yokuzalwa kanye lesithupha. Ngiloba nje uSehlulo usebuyele esikolo ukuze afunde, konke lokhu ubonga unina osaphilayo ngoba engekho kwakuzabanzima ukubana athathe lezincwadi njalo leTrinity Project eyamelulekayo njalo yamupha ithemba lapho esedelile ukubana uzayithola incwadi youzalwa kanye lesithupha .
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773195055
