uMthunywa
UMCULI we-kwaito owaduma ngengoma ethi Tjovitjo, uBrickz useveze ukuthi isondele ku-R2 miliyoni imali ayichitha ethatha izidakamizwa okuyinto eyamxabanisa loDJ Cleo.
Lokhu ukutsho engxoxweni akade elayo ohlelweni iReal Gobhoza, kuSABC 1, ngoMgqibelo loCleo ekhona.
Laba bebe kulolu hlelo njengoba besanda kukhipha ingoma ethi Amafluit ngemva kweminyaka engu-10 bengabonani.
U-Cleo uthe okokuqala evula isifuba ngokuxabana kwabo njengoba uBrickz, wayemotsha imali eyidla ezidakamizweni.
“Useleminyaka emibili engazithinti izidakamizwa. Lami angisibonanga isidingo sokungasebenzi laye ngoba ufundile emaphutheni akhe awenzayo,” kutsho uCleo.
Uthe ngesikhathi uBrickz ebona ukuthi imali iyangena kulapho ayebona ukuthi kungcono ayimotshe.
Laye uBrickz ukufakazele lokho wathi indlela ayebona imali ingena ngayo wayengasazi ukuthi ayenzenjani.
“Ngalahlekelwa abantu ababili ababebalulekile empilweni yami, yikho okwangenza ngangena ezidakamizweni. Abantu engangifisa bangibone ngiphumelela empilweni futhi ngibathengele imizi ngalemali engangiyithola ukuze baziqhenye ngami babengasekho,” kutsho uBrickz.
Laba uma bechaza ngengoma yabo entsha bathe ibathathe amahola angu-14 ukuyipheka.
“Ingoma izatholakala mahala okwakhathesi kubo bonke abayifunayo. Sisazosebenzisana kodwa angibuyile esitebeleni sikaDJ Cleo.”
Ngo-2015 kwavela ukuthi uBrickz usefuna ukusebenzisana loDJ Cleo ngemva kwengxabano yabo.
U-Cleo kwavela ukuthi wamtshela uBrickz yini okumele ayenze ukuze baphinde basebenze ndawonye.