Uncategorized

Ubhuqa iloja elingabhadaliyo umasitanda

13 Jun, 2019 - 00:06 0 Views
Ubhuqa iloja elingabhadaliyo umasitanda

uMthunywa

Bongani Ndlovu

LABAYINATHE ingela tshukela itiye yangoMgqibelo bayizwe inambitheka ngenxa yendaba ekade isemlonyeni yazo zonke izakhamizi zeCowdray Park kulandela ukubhuqwa kweloja ngumasitanda walo ngenxa yokwehluleka ukubhadala imali yerenti.

Kubikwa uMnumzana Adrian Chimiso ubeseqede inyanga ezimbili engabhadlali irenti okuyikho okuqubule umasitanda wakhe uMnumzana Michael Maseko waze wambhaxabula.

Ekhuluma lentatheli kaMthunywa uMnu Maseko uvumile ukuba utshaye uChimiso ngoba emdelela esekela ukubhadala imali yerenti.

“Lokho angikwali sibili ukuthi kuke kwaba lokungazwani phakathi kwami loAdrian ngempelaviki ngoba ubengabhadali imali yakhe yokuhlala njalo ubengasahloniphi umthetho womuzi wami.

“UAdrian ubeselenyanga ezimbili engabhadali imali yokuhlala engathengi lamagetsi kodwa ngempelaviki uyabe ebuya endlini edakiwe ehamba lamankazana ehlukeneyo kwezinye insuku njalo ubuya lamankazana labangane bakhe bezobanga umsindo silele,” kuchaza uMnu Maseko.

Uqhubekele phambili waveza ukuba uphele uthando ngempelaviki lapho athutshe lentombi ezintathu lotshwala bebanga umsindo sebelele.

“Ngiphelelwe yikubekezela ngempelaviki lapho abuye khona lamantombazana amathathu lotshwala bebanga umsindo kukanti ebengabhadali imali yami yenyanga ezidluleyo yikho ngithukuthele kakhulu ngoba kukhanya ukuthi inhlonipho akalayo lumfana,” kuchaza uMnu Maseko.

Ekhuluma lentatheli kaMthunywa uMnu Chimiso ubikele intatheli kaMthunywa ukuba uyazisola ngesenzo sakhe njalo uyaxolisa.

“Okokuqala ngithanda ukuxolisa kubaba uMaseko ngesenzo sami sangempelaviki ngoba ngiyazi ukuthi ngiphambanisile, kodwa ukungabhadali imali yakhe akukho phezu kwami ngoba isimo selizwe sinzima khathesi kodwa ngiyafuna ukumbhadala. Okokunatha utshwala lokubuya lamankazana lokho loba ungelamali kuyenzakala kuloba ngubani,” kuphetha uMnu Chisimo.

Share This:

Sponsored Links