uMthunywa
Thokozile Mbedzi
KULENDODA yeNembudziya eGokwe ngaphansi kwenduna uChireya okubikwa ibhaxabule umakhwapheni wayo waqaleka yethuka yasizibulala.
Kubikwa uTinashe Chakanyuka waxabana lomakhwapheni wakhe, uJosephine Nyamasi ngeviki ephelileyo wasequleka.
UChakanyuka uthe ebona lokhu lwamtshaya uvalo ethi uNyamasi usefile, wazibophela ephahleni lwendlu efanayo.
Ekhuluma lentatheli kaMthunywa uMnumzana Ben Nyokoto uthe uChakanyuka waxabana lomakhwapheni wakhe ngesizatho esingaziwayo besendlini yabo eHuni Compound eZenda Mining area.
“Ekulweni kwabo uNyamasi waquleka uChakanyuka wahle wethuka embona engasanyikinyeki wazibophela ephahleni lwendlu efanayo.
uInspector Emanuel Mahoko
“Umakhwapheni waphaphama wathi ethi mehlo suka wabona ijaha lakhe lilenga ephahleni,” kulandisa uMnu Nyakoto.
Isikhulumi samapholisa esabelweni seMidlands uInspector Emmanuel Mahoko ebuzwa ngodaba lolu uvumile wathi solufikile ehofisini yakhe.
“Samukele umbiko wendoda etshaye umakhwapheni wayo waquleka yasisethuka isithi usedlule yazibophela endlini efanayo,” kuphetha uInsp Mahoko.
