uMthunywa
Ethel Ncube
BATHABE bamanzi te abahlabeleli baka-maskandi abavela eZimnyama, ePlumtree u-Aphiwe loSobancane kulandela ukukhethwa kumncintiswano wamaRoil Bulawayo Arts Awards (BAA).
U-Sobancane loAphiwe ngabanye abakhethwe ukulwela isicoco seOutstanding Newcomer of the Year.
UMthunywa uxhumane lomaneja weqembu leli, uHandsome Moyo obike ukuba bathabe bathinta amayezi ngokukhethwa kwabo ukuthi bancintisele isicoco lesi.
“Ukukhethwa ukuba silwele isicoco kumaBulawayo Arts Awards kuzindaba ezinhle kakhulu njalo kuyasithokozisa lokho. Ukukhethwa lokhu kutsho ukuba sihamba ngendlela eqondileyo emculweni futhi kwenza leqembu libe lomdladla wokuqhubeka lihlabela ngoba imisebenzi yethu kutsho ukuba iyathakazelelwa ngabantu,” kubika uHandsome.
Uqhubekele phambili eveza ukuba bacela abantu babavotele.
“Sicela amavoti enu ukuze uAphiwe loSobancane bathathe indondo yeNewcomer of the Year iye ekhaya.
“I-link yokuvota isikhona ekhasini lethu leFacebook elibhalwe Aphiwe and Sobancane. Sicela livote ngobunengi benu,” kuphetha uHandsome.
Abanye abalwela isicoco lesi nguDa Kudu, Fury Gun, Albinism Connect Band loBhila.
