uMthunywa
Ethel Ncube
AZILAMATHE izakhamizi zeMatshe-umhlophe koBulawayo ngemva kokuba inja ithutshe lengxenye yangaphansi yomzimba wosane olusanda kuzalwa.
Isiga lesi senzakale ngeviki ephelileyo lapho enye indoda ethe isendlini yayo, inja yayo yathutsha ihudula ingxenye yomzimba yangaphansi yosane, kulesisu lembala kodwa kungelakhanda.
Kuvele ukuba indoda le, eleminyaka engu-34 yokuzalwa ithe ihlezi endlini yayo yabona inja yayo ithutsha lengxenye yomzimba wosane iqala esiswini kusiya embaleni kodwa unyawo lwenxele lungekho.
Kusenjalo kulelinye njalo inina leMbundane elidobhe usane olusanda kuzalwa entabeni lugoqelwe ngethawulo.
Kubikwa inina leli laqala ledlula lisiya entabeni ukuyathandaza lisithi unina wosane useduzane kodwa lethuka seliphenduka lifica umntwana elokhu elapho okwenza wayabikela amapholisa.
UMthunywa uxhumane lesikhulumi samapholisa koBulawayo uInspector Abednico Ncube oveze ukuba izehlakalo lezi zombili bazamukele.
“Lezinsuku amacala okulahlwa kwabantwana, ukufihla ukubeletha kunye lokukhitshwa kwezisu lamanye amanengi agoqela abantwana abasanda kuzalwa ayanda koBulawayo.
Sikhuthaza abesifazana ukuthi bazame ngazo zonke indlela ukuvikela ukuzithwala okungahlelekanga kodwa nxa sekwenzakele kumele badinge usizo kumalunga emuli, abamasonto kunye labakhokheli bezigaba kumbe amapholisa eVictim Friendly Unit ukuze bathole usizo,” kuphetha uInsp Ncube.
