uMthunywa
Ncekwenhle Ncube
BADLELA egilweni ababalisi besikolo seNyashongwe Primary eKezi kulandela ukukhitshwa kwempisi lenyoka ebisihluphile esikolo lesi ngokubatshintshanisa impahla ebusuku belele okucatshangelwa ukuba ngokomunye umbalisi, uMthunywa uyakuveza lokhu lamhlanje.
Ababalisi besikolo lesi baqede umnyaka ophelileyo bepika begqoke ezabo esikolo lesi nanko phela kubikwa bebevuka nsukuzonke betshintshene impahla kodwa besemnyameni ukuthi kuhambe njani.
Indida le yenza kwahlahlulwa okuyikho okwenze kwakhitshwa inyoka kanye lempisi okuphilayo kwenye indlu yababalisi esikolo lesi.
UMthunywa uxhumane labanye ababalisi abangathandanga ukubethwa amagama abachaze ukuthi bahlalele evalweni njengoba izikolo sezivuliwe.
“Saqeda nzima ithemu edluleyo, ebusuku sasingabuquthi ngitsho kungathi kulomuntu ophosela amatshe emazengeni. Kwesinye isikhathi umuntu evuke egqoke izigqoko zomunye umbalisi. Lokhu kwakuyangisa.
“Njengoba izikolo sezivuliwe asazi ukuthi kuzabe kumi njani. Mhlawumbe izinto zizabe zitshintshile njengoba sathi sivala kwabizwa osiyazi abayibo ababuya bazokhupha impisi okuthiwa yayigadwa ngomunye umbalisi engingeke ngimqambe ngebizo,” kulandisa umbalisi lo.
Omunye umbalisi uthe lokhu noma kwenzakala ngeke akhulume ngakho ngoba abavunyelwa ukukhupha imfihlo yesikolo sabo.
Intatheli ixhumane lomphathi wakulesi isikolo uMnumzana Dube othe ngeke akhulume ngodaba lolu kodwa abaqhatshi bakhe yibo abangaphendula ngcono.
“Ngeke ngitsho lutho mayelana lodaba elikhuma ngalo. Abaqhatshi bami yibo abangenelisa ukuthi baphendule ngcono mayelana lodaba lolu.
Induna uMalaba ithe ibuzwa mayelana laloludaba ukuthi bazenzanjani ukuze ababalisi bakhululeke uthe lokho kwenziwa ngabantu besigaba ngakho ababalisi kumele bakhulume labo.
“Lo ngumlandu wethu njengendawo. Akulani lamaphepha. Nxa ababalisi belenkinga kumele babikele thina. Ngeke ngikhulume mayelana lenyathelo esizalithatha ngoba kuqondene lathi,” kutsho induna uMalaba.
