uMthunywa
Cornelius Luphahla
KUZABE kuguga othandayo ngempelaviki eWhite City Stadium koBulawayo lapho okuzabe kulomkhosi omkhulu weChibuku NeShamwari owokuncintisana kwamaqembu omculo wesiNtu kanye labathungi bezitsha zesiNtu.
Umkhosi lo uzakuba khona ngoMgqibelo mhlaka 30 Ntulikazi kuyonale iviki lapho okuzabe kuncintisana amaqembu ezesiNtu ngenhloso yokuthuthukisa ezamasiko kuleli.
Emkhosini lo kuzabe kulamaqembu emigido yesintu alitshumi agoqela izabelo zonke ezilitshumi ezikhona kuleli.
UMthunywa ukhulumisane lomunye wabo-manager bale inkampani waveza ukuthi umncintiswano lo uhlose ukuphakamisa utshwala besiNtu kanye lokuthuthukisa amasiko jikelele.
“Umkhosi lo siwenze ngenhloso yokuphakamisa utshwala besiNtu njengoba iChibuku kubutshwala bakuleli.
Ukuqakathekiswa kotshwala bakuleli kudala ukuthi abantu baqakathekise amasiko akuleli okuyikho okudala ukuthi athuthuke.
“Okunye njalo kuzakuba lokuncintisana kwabathungi bezitsha zesiNtu, amangqongqo kanye lokubukiswa kwempahla zakhathesi ezikufeshini kodwa lezimpahla zizabe zingezeChibuku,” kutsho u-manager lo.
U-manager lo uqhubekele phambili njalo waveza ukuthi amaqembu emigido yesiNtu azabe ekhona azaphiwa imivuzo etshiyeneyo kusiya ngokuthi enze njani emncintiswaneni lo.
“Phakathi kwamaqembu emigido yesiNtu azancintisana kulo umncintiswano. Iqembu elizedlula wonke lizaphiwa imali engange $7 000, elilandelayo liphiwe imali engange $5 000 kuthi elesithathu liphiwe i-$3 000. Lokhu sikwenzela ukuthi amaqembu la athuthuke ngoba yiwo aphakamisa amasiko akuleli.
“Ngemva kwalokho kuzakuba labaculi abathize abazajabulisa uzulu nxa sokuntambama kuze kuyelamula ukukhathala kwabantu,” kutsho u-manager lo.
Umculi lomgidi weminye yemigido yesintu uClement Magwaza ongomunye wabaculi abazabe bekhona ekujabuliseni uzulu ngalelilanga uchaze ukuthi uzulu kahlale elindile ngoba uza lokukhulu.
“Ngikhuthaza umphakathi ukuthi uhlale ulindile ngoba ngalelolanga ngizabatshayela ingoma zami ngibabonise ukudla kwamehlo. Idlalade engizalitshaya kakhulu ngelalonyaka elithi Istambo Sami. Okunye njalo ngizatshaya lezinye ingoma zami ezikhuthaza ngezamasiko ukuze abantu bengalahlekelwa yibuzwe babo,” kuphetha uMagwaza.
