Ethel Ncube
AKUBIZWA ozwayo eBulawayo Theatre ngeviki ezayo lapho iqembu leSunduza Dance Theatre elizabe lisethulela izikolo ulwazi mayelana lokugcinwa kwenyamazana zasendle langokulondoloza imvelo.
UMqondisi waleliqembu uCharles Banda uveze ukuba banxusa izikolo zakoBulawayo ukuba zibuye zizozibonela zilalele ngendlebe imfundiso ezizayithola kuqembu leSunduza Dance Theatre.
Ekhuluma lentatheli uBanda ubike ukuba kuqakathekile ukuthi izikolo zilethe abafundi bezofunda.
“Iqembu lethu lizabe lise Amphitheatre mhlaka 17 Nkwenkwezi njalo lapha sikhangelele ukwethula ulwazi ngenyamazana zasendle lokulondolozwa kwezemvelo kubafundi bezikolo ezitshiyeneyo.
“Sizabafundisa njalo ngokubethulela umdlalo okhuluma ngesilwane esabulawayo uCecil the lion. Inhloso yethu yikuba abafundi basuke sebelolwazi ngenyamazana zasendle kanye lokulondoloza ezemvelo. Inyamazama akumelanga bazibonele emfanekisweni kodwa kumele bazifunde ngokubukela umdlalo kumbe ukuhlabelela.
ISunduza Dance Theatre ayijonganga ukujabulisa kuphela kodwa ifuna lokufundisa umphakathi kungakho-ke sithe sike sinxuse abantwana besikolo bake bazothapha ulwazi ngendlela etshiyeneyo,” kubika uCharles,” kuphetha uBanda.
