uMthunywa
ISIZINI ka-2016 kwezemidlalo isitshaye yedlula. Lamuhla iphephandaba likazulu lethula indaba ezaphathwa emlonyeni yabalandeli labathandi bemidlalo etshiyeneyo ezabanjwa zintatheli zethu.
Bezigcwele indaba ezihlabusayo kodwa sikhethe ezimbalwa esibona angathi zathinta inhliziyo zabalandeli.
IBosso ithakazelela iminyaka engu-90
Lo bekungumnyaka wokuthakazelela ukusungulwa kweqembu leHighlanders. Iqembu leli lasungulwa ngo-1926 ngakho kulumnyaka belifikisa iminyaka engamatshumi ayisitshiya galolunye likunguqu.
IBosso yenze imicimbi yokujabula ebalisa imidlalo lamathimu akoBulawayo akuPSL. Amalunga alithimu avakatshela eGrahamstown ukuyabona amathuna amakhosi asungula iqembu kanye lokufika engcwabeni lomunye wabazukulu beNkosi uLobengula.
IHighlanders iqoqe umdlalo wobungane lesitha sayo esidala iDynamos kulinyanga.Kwenziwe lombuthano wokubukisa imifanekiso yeqembu kusukela ngo1926 enkundleni ye-National Gallery koBulawayo.
IBosso inqoba iDynamos
Okwakuqala okuzavusa injabulo yalabo abasekela iHighlanders yikunqoba kwalithimu iDynamos kuligi yeCastle Lager.
IBosso yatshaya iDeMbare yayiphendulela kuwo wonke amahlandla. Lokhu kwaqeda isiqalekiso seminyaka eyisitshiya galolunye iBosso isehluleka ukunqoba iDynamos. Iphephandaba likazulu lakhipha izihloko ezinengi ngomdlalo lo, kwaze kwaduma le eyathi “IDynamos ayikhohlwe . . . ”
Bonke sebelandela uBruce Kangwa
UBruce Kangwa watshintsha umdlalo wabayinsika yeHighlanders ekuvulweni kwesizini yalonyaka. Umdlali lo ubesewathela amabhola elandelana emanethini ngendlela engakaze ibonakale. Usuke ngoNhlangula wayadlalela iAzam, iqembu leTanzania. UKangwa utshiye ehlohle amabhola amanengi kulabadlali bonke njalo waphiwa isicoco sokuba lamabhola amanengi.
Ukuthengwa kuka-Kangwa eTanzania kuvulele abanye abadlali bakuleli amasango khonale ababalisa lomdlali wakoBulawayo uFrancesco Zekumbawire. Abacuphi bamathimu kubikwa sebezaqala ukuthi bavakatshele imidlalo yakuleli bezodinga abadlali abalakho ukuyadlalela kubo.
UShadreck Mlauzi wenza izimanga
La kwakuyikuqala komnyaka kukhulunywa ngobuhle bokuphumelela ukungena kuma-Olympics okwenziwa ngamaMighty Warriors.
Umqeqetshi walithimu uShadreck Mlauzi wanconywa yimuli yenguqu ngomsebenzi wakhe ngokukhuza amantombazana esizwe aze ayamela iAfrica kumqhudelwano wama-Olympics. Ngokwenza lokhu, uShadreck waphiwa uvava lwemota.
Singcono kuleBorder Strikers: Prof Jonathan Moyo
Kulolu daba iphephandaba likazulu lakhuluma loJonathan Moyo mayelana lamacebo wokuncedisa iqembu leTsholotsho. Ngalesi isikhathi iTsholotsho, ebizwa ngokuthi yiZiqholo zeZhwane ibithwele nzima ngokunqotshwa langokuswela usekelo kundleko zayo ezitshiyeneyo.
Uza ngomfutho njalo umdlali weBosso
Lapha kwakukhulunywa ngoPeter Muduhwa. Umdlali lo uze ngomfutho kulisizini waze wathola ukubongwa kukhalenda yezingcitshi zalonyaka kuligi yeCastle Lager. UMthunywa ubuye wakhuluma lomdlali lo ebuzwa ngekusasa yakhe, wabika ukuthi “angiyindawo mina”.
Sekuthe dlwe ku-netball
Umdlalo we-netball wathola usizo lokuqhuba imidlalo yeSuper League kanye lokuqhuba imincintiswano ezikolo.
Amankampani abalisa iStell Tea leTanganda aphume phambili encedisa abasakhulayo kulumdlalo.
Egxobe udaka inathile! I$300 ibhidliza iBulawayo City
Umsekeli kamqeqetshi weqembu leBulawayo Chiefs uFarai Mujokoro watholakala elecala lokuzama ukuqilibezela impumela yomdlalo weqembu leli leBorder Strikers. UMujokoro kubikwa wathumela i$300 enikeza unozinti weBorder Strikers, ikanti wayengabuzanga elangeni. Udaba lwafika emapholiseni lakuPSL, umqeqetshi watholakala elecala.
AmaWarriors kuAfcon
Umnyaka ka2016 ulethe injabulo ephindiweyo kubalandeli benguqu. Iqembu lesizwe amaWarriors lakhankasa kwezwakala linqoba amanye amaqembu ukuze liphumelele ukuyadlala kunkezo yamazwe kweleGabon ngoZibandlela ka2017.
Sekubusa uChiyangwa loSibanda
Loba sikhethe ukuthi silobe isihloko lesi ekucineni, udaba lolu lokhe lubaba emlonyeni yabanengi. UPhilip Chiyangwa wavotelwa ukuthi abengumongameli wenhlanganiso yeZimbabwe Football Association. UOmega Sibanda wakhethwa ukuthi abengumsekeli wakhe.
Bambalwa ababecabangela ukuthi uChiyangwa loOmega bengangena kuzikhundla lezi, kodwa nanko kwenzeka.
Bobabili laba bazama ukuthi balungisise inkinga ezikunguqu ngokutshiyana leZifa. Bazama ukusungula iNafaz — okwakumele kube yinhlanganiso entsha kwehlula.
Kubukhokheli bukaChiyangwa, amaWarriors angene kuAfcon, amaMighty Warriors ayancintisa kuma-Olympics kuthi iqembu labafaba ama-under 20 labayintshantshi yeAfrican Union Sports Council eAngola.
Inhlanhla imlandele uChiyangwa ngoba kulinyanga ukhethwe ukuthi abeyinkokheli yeCosafa.
