uMthunywa
Mthwakazi kaNdaba kule iviki iphephandaba likazulu liphethe indaba enkulu njalo eqakatheke kakhulu ngoba iqukethe impilo kanye lesiphatho somntwana kusukela engakazalwa aze akhule. Abadala babethi ezinye izinto kuyazila ukuthi zenziwe ikakhulu ngumuntu ozithweleyo? Lapha bayabe bechaza khona kanye ukukhuliswa komntwana.
Kwakuthi nxa umuntu esazithwele uzwe kuthiwa angaze wahamba ngenyawo kumbe engaboquma phakathi komhlambi wenkomo. Lokhu kuyabe kusenzelwa ukuthi mhlawumbe engahamba ngenyawo abantu bazamcupha bambophe ukuthi angaze wabeletha okungambulala. Nxa sebotshwe kanje kwakwenziwe imizamo ethile yokumelapha ukuthi akhululeke. Yebo kambe minengi imithi ayiphiwayo kodwa akwaze kwasweleka ingqwatshi kabhemi phakathi kwayo.
Okunye ngeke sakubalisa kodwa okuqakathekileyo yikuthi abantu babekwazi ukuthi umntwana uqala ukunakekelwa esasesiswini sikanina. Nxa kuthiwa ungaze waquma phakathi komhlambi wenkomo uzithwele kuyabe kukhumbulelwa ukuthi mhlawumbe inkomo zakhona zilomthuso omubi ongenza ukuthi umkhubulo uphume.
Kwesinye isikhathi njalo kuyabe kusenzelwa ukuthi umntwana sengazalwa elenkanda engelapheki lula engamhlupha ekukhuleni kwakhe.
Kwakuthi nxa umntwana sebelethiwe uzwe kuthiwa unina kaphumi phandle nxa umntwana esasemncane. Lokhu kuyabe kusenzelwa ukuthi engaze wahabula inkanda kumbe eminye imimoya emibi ekuhambeni kwakhe funa ihlasele umntwana. Angithi nje ungathanda ukuhamba usaselomntwana omncane kaphuzi ukwamukela inkanda yemzini eliyabe lingazi lokuthi yelatshwa kanjani.
Abanye babethi nxa kukhona abakusolayo mayelana lokuzalwa komntwana ikakhulu nxa uyise engakholwa ukuthi ngowakhe wawuzwe kuthiwa unina womntwana utshona eluswe nguninazala kumbe ngesinye isalukazi sakuleliguma. Ekwelusweni lapha uyabe engavunyelwa ukuthi anyathele lapho okuhamba khona abesilisa kuze kwenele iviki eyodwa lapho umntwana oyabe sewe khona inkaba.
Mhlanokho ke ekuseni ilanga lingakaphumi uzwe abizwe unina womntwana kuqondwe eziphaleni ayebuzwa ukuthi ngabe umntwana ngowalapho ekhaya na? Nxa eqhubeka ethi ngowalapho uyaqhutshwa ke umkhuba lo abuye uyise womntwana ephethe ingungu engatshaywayo kuthiwe unina amphathe umntwana kuvele inkanda egcekeni. Nxa kunjalo ke sezayikhothamisela enkanda yomntwana ingungu le kodwa ingaze yamthinta umntwana.
Kungabanjalo uyise womntwana uyayitshaya ingungu le kanye kumbe kabili. Lapha ke izalukazi ezilensolo ngalo umntwana ziyabe sezihlengezela izinyembezi osokukudala zoma ngoba iyabe siyenzekile indaba. Nxa umntwana lo engasowalapha ekhaya uhle aqaqambe bakithi kuze kuhele kozeleyo. Akupheli sikhathi singanani umntwana lo ephila. Ubona ngesalukazi sesidondolozela sisiza kwabesilisa sizobika ngokudlula kwalolusane. Nxa sokunje unina wosane abanye bayamxolela kuthi abanye bahle bamthwalise ezakhe alubhekise kibo.
Nxa umntwana lo engasafanga abomdeni babehle bajabule kube nzima kuhlatshwe imbuzi kuthiwe izadliwa ngumalukazana lo ukuze akhulise umntwana eqinile. Umalukazana lowo uhle aqakathekiswe kakhulu kuvalwa ukuthi kade sebemninde ngobeqaqa. Lapho ke loninazala uyabe sengasafuni kuzwa ngomuntu okhuluma ngaye kubi.
Ngenxa yozwelo lwezalukazi ekucineni besokuthi nxa bebona ukuthi umntwana kasowalapha ekhaya bambuzisise umalukazana avume bamtshontshise ebusuku ayenyathela okuhamba khona abesilisa kuleliguma. Akupheleli lapha ke ukulungisa lokhu kukhona njalo okwenziwayo esingeke sakuveza. Nxa sokwenziwe lokhu noma umntwana setshayelwa ingungu le amane azithulele kungabi ndaba zalutho. Kodwa nxa ungakwenzanga konke ngoba umkhuba lo kawupheleli lapha kukhona okunye okwenziwayo, umntwana lo uhle akhule esangene emkhumbulweni.
Yikho-ke okwenza umkhuba lo wahlehlela nyovane kulabo ababewenza nxa kukhona abakusolayo ebantwaneni babo. Yikho osokudala ukuthi amavezandleba agcwale egumeni. Okunye okudala lokhu yikuthi sebebalutshwana abakwaziyo ukukwenza lokhu.
Umlobi ungamthinta kunombolo ezithi 0737 771 317 kumbe ku 0775 722 298. Asixoxeni.
