uMthunywa
BABETSHO beqinisile oMandulo amaNtungwa akoMthwakazi ukuthi okwehlula amadoda kuyabikwa njalo ayikho eyehlula inkundla. Noma nje kukhona ezifaniswa lamasi akoSibindi aliwa layizinja kodwa babewaqunge phela amasi ubumunyu bawo bumunywe lihiqa. Kunjalo bakaMalandela, kayikho eyehlula abaniniyo bamana bayibhulabhule buphele ubuqaqa bayo bayiqhole ngemadlana, umguza kanye langomsuzwane.
Ngalokhu kule iviki sizaphatha njalo ezihlabekisa uzulu ikakhulu kwabesifazana abakhala ngokungabonwa ngamajaha uthole umuntu esemdala esesabeka kodwa umendo kumbe ijaha qha. Kunjalo-ke empilweni kodwa lokhu kwakwenzakale nxa kukhona okunuka santungwana hatshi mahlayana nje. Banengi-ke abakhala ngaloluhlupho ikakhulu abasemakhaya asazi kumbe sihlahla bani esahlanyelwa emakhaya esibavalela ukukhanya.
Uhlupho lolu olokuba yinjendevu angithi nje kuvame ukuthi kaluzi mahlayana kodwa luza ngemva kokuba intombi yetheswe ithunzi elibi ngabantu ikakhulu abomdeni wayo. Lokhu kwenziwa ngumuntu olomhawu ongafuni ukubona leyo ntombi iphumelela. Kuvame ukuthi okwenzayo lokhu kube kulempi phakathi kwakhe labazali bale intombi.
Yibo-ke ubuthakathi okuhlala kukhulunywa ngabo ngoba kakho ongavala intombi ukukhanya kwayo engakhunkuli.
Angithi nje kukhona okwenziwa ngabantu abagangileyo ukuthi umuntu abe ngumjendevu. Injendevu phela ngumfazi kumbe intombazana engakhonjiswayo njalo lokhu abakwenzayo kabathathi isikhathi eside ukukwenza kodwa ngeke ngakuchaza ngoba kukhona izigangi ezinxwanele ukubhidliza impilo zabantu. Lapha-ke ngizathinta indlela okwakunqundwa ngayo isenzo sokuba ngumjendevu.
Ekadeni khona kwakuthi nxa intombi ingumjendevu izalukazi zaziyibona kusasemasinyane ngoba intombi le iyabe ingathandi ukuhamba lamanye amantombazana. Lokhu kwakungenxa yokuthi iyabe ithi nxa ithe yahamba lawo amajaha amane akhethe ezinye isale iyodwa zwi. Kwesinye isikhathi nxa amantonbazana emahlanu lamajaha emahlanu azakhetha amantombazana la amane kuthi elinye lala amajaha lisale lingakhethanga limane liqonde komunye umango.
Lapho-ke intombi le izafuthelana isale ihamba yodwa kuthi noma ithe yathunywa lamanye amantombazana iyale uyibone ikhetha ukuzihambela yodwa. Lapho-ke kuhle kubelula ukuthi izalukazi ziyibone intombi le ukuthi kukhona okutshaya amanzi. Kungaba njalo ziyayibizela eduzane ziyibuzabuze ngejaha layo.
Ngalesisikhathi intombi le iyakuveza konke okwenzakalayo nxa ithe yabona amajaha, lapho-ke izalukazi zihle ziyifunde ivaliwe. Ziyayiduduza-ke intombi le kuthi esinye salezizalukazi sizakhethwa ukuba siyisebenze.
Ekuyisebenzeni lapha kudingeka izihlahla ezinengi sibili ukuze kuphungwe ithunzi lesilisa eliyabe letheswe phezulu kwayo.
Ekusetshenzweni kwentombi le kuvame ukuthathwa izihlahla ezigoqela igezabantwanyana, indabulavalo, ibhodisa, injobo, indabulavalo, iphunganhloni, isithundu, ukhalimela, amaxolo omkamba, kanye lezinye izihlahla ezehlukeneyo kuhlanganiswe. Kuthi kunjalo isalukazi siyekukha amanzi esizibeni esikhulu kakhulu kumbe sithathe amanzi obhalu lwesihlahla somkhomo kumbe esomkamba.
Amanzi la azathelwa enqayini elemigcozo le alale ngaphandle komuzi. Kusisa ekuseni kusempondozankomo isalukazi sizavuka lentombi le siye layo eguswini sifike siyethese inqayi le ekhanda. Ngalesisikhathi sizathatha uphehlo lwesihlahla somvalasangwana siqale ukuphehla enqayini le kuze kuphuphume amagwebu.
Azaphuphuma-ke amagwebu la intombi ize ibe manzi te umzimba wonke qede siyithele ngamanzi la kanye langezanzoco lezi.
Kuthi nxa kunjalo isalukazi sizathi intombi le ihlubule izigqoko ezigqokileyo qede sizithathe sizigqibele lapho akade siyihlambela khona. Ngemva kwalokho sizasuka layo inqunu injalo baqonde ekhaya bengathalazi emuva baze bayefika. Ekungeneni lapha kufanele bangabonwa muntu ngoba intombi le izabe inqunu ngakho kungenelwa ngemuva kweziphala.
Kungenziwa lokhu kwakuthi mhlalokho ilanga lisiyatshona intombi le izabe isidiniwe ngokulandelwa ngamajaha.
Yikho-ke okwakusenziwa endulo ilizwe lisahlezi.
Mlobi ngithemba uphilile. Ngithanda ukubonga umsebenzi wakho omuhle osenzela wona ngokusikhumbuza ngempilo enhle yasendulo. Ngalokhu mina ngicela usizo ekuthini nxa intombi ithanda kakhulu abesilisa noma nje ithi nxa ilomkayo imtshele ukuthi uyayijabulisa njalo uyayisuthisa endlini kodwa iqhubeke ithandana lamanye amadoda njalo ilala labo okokuthi lisiyatshona iyabe isilele lamadoda amahlanu. Siza mlobi ngoba indoda yalo umfazi ingacina isisenza ingozi ngoba umkakhe lo uthi uzwa kusithi kahlale elala lendoda. Nkulumane Moyo, Johannesburg, South Africa.
Mlobi ngithanda ukuncoma umsebenzi lo osenzela wona owokuthuthukisa ezamasiko ngisithi qhubekela phambili ngomsebenzi lo ngoba uyasithuthukisa kwezamasiko. Ngalokhu ngithanda ukwazi ngokukhuliswa komntwana kusukisela esasemncane aze ayekhula. Ngingajabula nxa ungangichazela ngalokhu.
Siyabonga mlobi umsebenzi lo owenzayo. ngithi Qhubekela phambili ufundisa ngoba intsha yonakele phandle lapha. Isicelo sami yikuthi usichazele ngendlela zokuchumisa ontanga ngoba inengi labo kalilanhlonipho, asazi kumbe kukhona okwakusenziwa ukuze intsha ihloniphe iziphathe njalo.
Mlobi ngiyabonga umsebenzi lo owenzayo ngoba uthuthukisa isiko, mina ngicela usizo lokuthi ungichazele mayelana lokwelatshwa kwemikhuhlane egoqela amazinyo, kanye lensini ikakhulu nxa kuhlasela umntwana omncane.
