uMthunywa
Ethel Ncube
INDUNA uGampu yeTsholotsho isikhuthaze abatsha ukuthi bahlukane lokusebenzisa izidakamizwa ngoba zilakho ukuphazamisa impilo kanye lempilakahle yabo.
izidakamizwa
Ngeviki ephelileyo bekubuthenwe kwesinye isikolo lapho obekulabezempilakahle kanye labanye akade belande ukuzofundisa abantwana mayelana lezidakamizwa kanye lobubi bazo.
UMthunywa uxhumane lenduna uGampu oveze ukuthi uhlelo abaluqhubileyo njengesigaba lumqoka kakhulu ngoba kulezinsuku abatsha basebenzisa izidakamizwa ngendlela eyesabekayo.
“Abantwana abanengi lapha babhema imbanje baphinde banathe okudakayo bethi bangakwenza lokhu sebesona bekhokhelelwa yikubhema kumbe ukunatha okuyinto engaqondanga.
“Ngesikhathi kufundiswa ngezidakamizwa lezi nginanzelele ukuba abantwana ulwazi oluncane balalo kodwa abaqondisisi ukuthi ububi bokusebenzisa izidakamizwa bungaphi?
Kungakho njengenkokheli sifuna ukuba ivangeli lobubi bokusebenzisa izidakamizwa likhulunywe ligcwale indawo yonke ukuze abatsha bengangeni endabeni zakhona,” kubika induna uGampu
Uqhubekele phambili waveza ukuba iTsholotsho kumele ibe lehofisi ebona ngabantu abasebenzisa izidakamizwa.
“Singakhuluma ngabangakangeni kuzidakamizwa kodwa laba ke asebevele bephakathi kwazo labo akumelanga sibatshiye phandle.
“Ngifisa kubelehofisi ezabencedisa labo abasebenzisa izidakamizwa ibeluleka ukuba abafuna ukutshiya lokhu bangenza njani ukuze behlukane lakho.
Abenelisayo bangasincedisa ukuba sibelasakhiwo esiqondane lokubona ngezidakamizwa ukuze sehlise inani labatsha labafundi abanatha okudakayo lokubhema.
Singenza njalo banengi abatsha abangaphathiswa baphinde bavikelwe kungozi yokusebenzisa izidakamizwa,” kuphetha induna uGampu
