uMthunywa
YiNtatheli kaMthunywa
ABALANDELI bethimu yezwe lonke, iHighlanders sebehlabe ukhwelo kuzo zonke indawo becela ukuthi umqeqetshi uMadinda Ndlovu labadlali bengaqini ukhakhayi ngokwehluleka ukuhlohla eMagumeni.
Emidlalweni eyisikhombisa iHighlanders ayikanqobi njalo ayikaligaxi entanjeni ibhola ekhaya layo.
Ibizo lomqeqetshi lo elithi “Khathazile” selizwisa ubuhlungu abalandeli beqembu abakhethe ukutsho imizwa yabo kuphephandaba likazulu kuliviki.
Inengi labo libika ukuba selikhathazekile ngeqembu likaMadinda. Akuhambi kuhle enkambeni yalumqeqetshi obekhangelelwe ukuthi ayakhe into eyesabekayo.
Ukukhalipha kwalumqeqetshi sekuphelele kuHighlanders kulandela ukudliwa kweqembu lakhe kumaviki amabili adluleyo, osekudale insolo kubalandeli baleliqembu ngokukhalipha kwalumqeqetshi.
Akubizwa ozwayo enkundleni ikakhulu kubalandeli beHighlanders asebebone iqembu labo lihuba ngokukhulelwa kokuphela. IBosso icine ukujabula mhla inqoba iDynamos kunkezo kazibuse.
Abasekeli abaxoxe loMthunywa bathe bakhulekela okungcono.
UNkululeko Tshambo, olodumo ngokusekela iBosso kuyo yonke imidlalo ukhuze abadala bethimu wathi abalungisise impi zabo.
“Sibulawa yikulwa kwabakhokheli beqembu. Ukulwa lokhu sekukhathaza labafana. Iqembu lizaphumelela.”
UThabisa “Gundu” Dube oweGwabalanda uthe kaboni icala ngoMadinda kodwa abadlali kumele batshintshe ukwenza phambili kwegedi.
“Sizawina. Siyavuma ukuthi ngemva kwemidlalo esesiyibonile eBarbourfields, iqembu liphekiwe. Umqeqetshi wenzile umsebenzi. Abadlali abenze umsebenzi wabo ngoba angeke sihlale sibhadalela ukuyasola enkundleni,” kutsho lumlandeli.
Uqhubeke wathi: “Lathi abalandeli lababukeli asibambaneni, singabhidlizelwa iqembu sikhangele.”
Umqeqetshi weChicken Inn uJoey Antipas ubikele uMthunywa ukuthi uyomele iHighlanders njalo kasoze avume ukuthi imyangise.
“Kumele ngiyinqobe iHighlanders. Ngiyazi ukuba lumdlalo uzabamkhulu ngoba iHighlanders ikusimo esibi njalo izafuna ukuvukela kithi. Sengibonile ukuthi iqine ngaphi iHighlanders, okutsho ukuthi sengilalo icebo lokuphuma nginqobile eBarbourfields.
“Ngiyayihlonipha lithimu kodwa angeke ngivume ukunqotshwa. Sikuligi efanayo, sonke sidinga impumela engcono,” kutsho uAntipas eqeda kulolonga kweyinye inkundla koBulawayo.
Umqeqetshi weHighlanders ekhuluma lentatheli ngemva komdlalo wabo leHwange, wabika ukuba useyiphekile ithimu.
“IHighlanders eliyibone lamhlanje, yiyo iphelele,” kutsho uMadinda.
Kusenjalo uDazzy Kapenya owake waba ngukaputeni weBosso icina ukuthwala inkezo yeligi uthe ubona angathi kumdlalo wangempelaviki kuzanqoba iBosso.
Umdlali lo ukhuthaze abadlali ukuthi bengakhohlwa ukuba ithemba likubo.
“Ukudlalela iBosso liphupho lawo wonke umdlali, manje cabanga ukuthi kuzwisa ubuhlungu kanjani ukuthi nxa usuyidlalela iqale kabi isizini. Ngibona kuqakathekile abadlali bakudala bahlale phansi labafana, sibakhiphe emqondweni wokuthi lokhu okwenzekayo kungenxa yokuthi bona abenzi kuhle.
“Laba abafana bancane, kubalulekile ukuthi baphange bajwayele ukunqoba. Kungumsebenzi wethu thina esibadala ukuthi sibasize abafana. Konke kuzalunga,” kutsho uCaptain Fantastic.
