uMthunywa
Thokozile Mbedzi
UDUBO lokusilela kwamagetsi elizweni luzathi ukwehla kancane nanko uMphathintambo wogatsha lwe-Energy and Power Development uSoda Zhemu uthe asethokala ngcono.
Isimemezelo sikaMphathintambo lo siza ngesikhathi amagetsi esilela ikakhulu ezindlini, lapho abetholakala khona okwamahola ayisitshiya galombili kuphela ngelanga.
Ekhuluma ekumbukiso weZimbabwe International Trade Fair, uMphathintambo uZhemu uthe abantu abakhululeke ngoba asekhona amagetsi.
“Amagetsi sesilawo njalo ngithanda ukwazisa ukuba asezingeni eliphezulu elizweni lonke, ngakho uzulu usezathola amagetsi ngokwaneleyo,” kutsho uMphathintambo lo.
“Kusetshenzwa gadalala ezititshini zethu. Lasemaphandleni sokufakwe amagetsi ezikolo ezitshiyeneyo lasezibhedlela. Sifuna abafundi bathole izifundo bengaphazanyiswa yikucitshwa kwamagetsi.
Ngikhuluma nje kulenhlelo ezikhona ezititshini zethu eHwange kunye laseKariba esezilungele ukuthi zitholise amagetsi kuzo zonke indawo.”
UMphathintambo Zhemu uthe loba bethembisa ukuthi amagetsi asekhona akutsho ukuthi azahlala ekhona.
“Khathesi sisebenza ngendlela yokuthi amagetsi aphekwa eHwange laseKariba atholwe nguzulu ngakho ngeke sithi azaba khona ngemva kwamahola amangaki ngoba kuzaya ngokuthi kutholakale amagetsi anganani.”
Uthe uzulu lamapholisa abaqaphele amasela empahla yenkampani yeZesa, wagcizelela ngokuthi bazaqakathekisa ukungacitshwa kwamagetsi ezibhedlela.
“Amagetsi azakuba khona kundawo eziqakathekileyo ezinjengezibhedlela. Intambo zingatshontshwa.”
UMphathintambo Zhemu uthe abantu kumele bakwazi ukuthi inkampani yeZesa ayibhajethi imali yokuthenga intambo.
“IZesa kayilabhajethi ehleliweyo yokuthi ibuyisele intambo ezitshontshiweyo, ngakho kulakho ukuthatha isikhathi esingaba yinyanga loba ezimbili amagetsi engekho, nxa kuthe kwatshontshwa intambo.”
