uMthunywa
Charity Moyo
INHLANGANISO yeAgritex isikhuthaze abalimi abafisa ukulima igwayi ukuthi baqalise ukuhlanyela khathesi ukuze livuthwe kuhle.
Kubikwa kusukela mhlaka 1 Nhlangula yikho lapho okuqala khona amalungiselelo okulima igwayi ukuze lilethele umlimi inzuzo enhle.
UMnumzana Davison Masendeke onguProvincial Agronomist uveze ukuthi abalimi beMatabeleland akumelanga bakhalale ukulima igwayi ngoba lilenzuzo enhle.
“Abalimi abanengi beMatabeleland sebaphosa amajogwe phansi ukuthi balime igwayi ngenxa yokuthi akulandawo zokulithengisa kulumhlubulo.
“Nyakenye kube labalimi abalutshwana kakhulu akade bevela kulo umhlubulo kodwa ngithanda ukukhuthaza abalimi bakithi ukuthi balime igwayi ngoba lilemali engcono,” kulandisa uMnu Masendeke.
Kubikwa abalimi abanengi beMatabeleland bebesebenzisa imali enengi bethwala igwayi labo belisa kuma-auction floors eHarare okwenza inengi labo lakhalala ukulima isilimo lesi.
UMnu Masendeke uqhubekele phambili wathi ngaphandle kohlupho lokuthwala igwayi lisiwa eHarare inhlanganiso yeAgritex izahlolisisa njalo imbangela ezenza abalimi bakulesisabelo bangathakazeleli ukulilima.
Kuzwakale ukuthi kuyonale iviki abalimisi bazaqalisa ukufundisa abalimi ngokulima igwayi.
UMnu Masendeke uphethe ngokukhuthaza abalimi ukuthi bangene kubhizimusi lokulima igwayi ngoba lilinywa kabili ngomnyaka njalo lilenzuzo enhle.
