uMthunywa
INHLANGANISO yeConfederation of African Football isibike ukuba amaWarriors asekhitshiwe kumqhudelwano we-Afcon ka2023.
Confederation of African Football
Ukukhitshwa lokhu kuza ngemva kokuba iSports and Recreation Commission (SRC) yehluleke ukubuyisela ibhodi yeZIFA kuselesikhathi ngaphambi kokuthi kuqale imidlalo.
Imidlalo yokukhankasela i-Afcon ka2023 ezadlalelwa e-Ivory Coast iqalisa mhlaka 1 Nhlangula.
Isimanga yikuthi umdlali wenguqu, ophinda abengukaputeni weqembu lesizwe, uKnowledge Musona laye ubike ngokutshiya ukudlalela ama-Warriors ngesikhathi esifanayo.
UMusona ubeyinsika yomkhankaso we-Afcon lo, njengokaputeni.
Andubana amaWarriors ajeziswe, inhlanganiso yeCAF ibibekezele kancinyane ilinde ukuthi kuphele impi phakathi kwe-SRC lequla leZifa elikhokhelwa nguFelton Kamambo.
Kumbiko wayo, iCAF ithe ibilinde umbiko weFIFA ukuze yazi ukuthi iphathe njani indaba yeZimbabwe.
Leqembu lesizwe seKenya likhitshiwe kulumncintiswano.
FIFA
“Ngenxa yokwehluleka ukumiswa kwabo yiFIFA, iCAF isikuqinisekisile ukuthi iKenya leZimbabwe ngeke zibe khona kumidlalo yokuhlungela iTotalEnergies Africa Cup of Nations eCote d’Ivoire 2023.
“I-CAF yayifake amazwe womabili kuhlu lwamaqembu azancintisa ekuqaleni kwenyanga kaMabasa kukhangelelwe ukuthi izijeziso zawo zizakwesulwa kusasele amaviki amabili ukuthi imidlalo iqalise.
IKenya leZimbabwe, azikagcwalisisi okufunwa yi-FIFA Congress,” kutsho umbiko weCAF.
Kusenjalo, ababukeli bemidlalo yamazwe sebetshayele uMusona ihlombe bebonga ukuzimisela kwakhe ukudlalela ilizwe.
Umdlali ubekwe kubanga labadlali abaphakamise ifulegi yeZimbabwe, wabangumzekeliso kubadlali abasakhulayo.
UMusona, oleminyaka engu-31 yokuzalwa, wazise ngokutshiya kwakhe kumaWarriors ngeviki edluleyo.
“Sengitshiya ukudlalela iqembu lesizwe ukuze nginikeze abanye abadlali bakithi lengcitshi ezisakhulayo ithuba lokumela ilizwe lethu,” nguMusona lo.
