uMthunywa
Cornelius Luphahla
ULIMI lwesiNdebele kukhanya luthuthuka ngamandla nanko phela omunye wabalobi bakuleli usekhiphe ugwalo oluhlabusayo okwamagama ngenhloso yokufundisa ngokuziphatha kanye lokuqakatheka kokubekezela.
Umlobi lo, uChristopher Ncube ijaha elidabuka esigabeni seSelonga eGwanda ukhiphe ugwalo olulesihloko esithi, “Phakathi Kwelitshe Lembokodo,” ekuqaliseni kwawonalo umnyaka njalo uthembisa ukuqhubekela phambili ngezokuloba.
Ekhuluma lentatheli uNcube uthe ugwalo lolu ulukhiphe phetsheya lujonge ukufundisa uzulu ngokuziphatha kuhle kanye lokubekezela noma ehlangana lobunzima.
“Ugwalo lwami ngilukhiphele kweleSouth Africa ngaphansi kwenhlanganiso yabalobi ebizwa ngokuthi Abalobi Bakithi. Kugwalo lolu ngijonge ukukhuthaza uzulu ngokuziphatha ngendlela enhle njalo lufundisa mayelana lempilo ukuthi noma kulobunzima umuntu kufanele abekezele.
“Lolugwalo ngaluloba ngemva kokunanzelela ukuthi inengi labantu liyazidela nxa selihlangane lobunzima abanye bayazibulala. Ngalokhu kulolugwalo ngikhuthaza uzulu ukuthi empilweni kulobunzima njalo kayisikho ukuthi umuntu angahlupheka uzaze ayekufa ehlupheka kodwa impilo iyaguquka. Lokhu ngikuchazile njalo egwalweni lwami ukuze abantu bathole isifundo esihle,” kutsho uChristopher Ncube.
UNcube uqhubekele phambili wathi ukhuthaza intsha ukuthi isebenzise iziphiwo zayo kwezokuloba ijabulise uzulu.
“Okunye njalo ngikhuthaza intsha yakululeli ukuthi isebenzise iziphiwo zayo ikakhulu labo abalesiphiwo sokuloba balobe ukuze bajabulise uzulu babuye bavuselele ulimi lwethu kanye lezamasiko ngoba isizwe yisizwe ngamasiko kanye langolimi lwaso,” kuphetha uNcube.
