uMthunywa
Ethel Ncube
OMAMA beNtalale eGwanda sebethole indlela yokuziphilisa ngokungena emgodini begebha igolide njengabobaba.
Omama laba baveze ukuba sebelesikhathi baqala ukuthwala amapiki lamafotsholo besiyaphanda amatshe aligugu ukuze baziphilise lezimuli zabo njalo benelise ukubhadalela abantwana indleko zesikolo.
Intatheli ixoxe lomunye walaba omama uNkosazana Siphiwe Nare oveze ukuba baphila ngokungena emgodini.
“Siqalisa ukuyagebha kwakunzima ngoba uyagebha ufike kumamitha ayi-20 ungatholanga lutho njalo ukugebha amatshe akulula kodwa asilalo elinye icebo lokuthi sitholele abantwana ukudla.
“Sibona kungcono ukuba thina singene emgodini abantwana bathole ukudla kanye lokuya esikolo,” kubika uNkszn Nare.
Omunye okhulume loMthunywa uNkosazana Lemuhang Dube uveze ukuba udubo yilo olwabangenisa emgodini.
“Uyabe uhlala wedwa kungelababa osebenzayo konke kukhangele wena. Ngiqala ukuyagebha ngangisehluleka ukugebha imitha eyodwa ngokuya kwesikhathi ngazibona lami sengisenelisa ukugebha okuzwayo khathesi ngiyagebha ngithole amatshe ami ngithwale ngiyegigisa ngithole imali yami. Kusentshenzwa nzima kodwa nxa kukuhambele kuhle usala uhlekelela esikhwameni labantwana labo uhle ubabhadalele imali zabo zesikolo uthenge konke okufunekayo,” kutsho uNkszn Dube.
Elinye njalo inina elithande ukubizwa ngelokuthi nguNkosikazi Moyo nje lithe akulamsebenzi umuntu wesifazane angeke awenza uma sokumele ondle imuli yakhe.
“Njengamanina akule indawo sakubona kufanele ukuthi sisukumele phezulu lathi senze okungasisiza ukuthi sondle abantwabethu.
“Ukugebha kunzima njalo kuyingozi kodwa ayikho enye into esingayenza kumele kusetshenzwe ngoba izimuli kumele zidle.
“Lokhu sikubona kuyindlela engcono kakhulu yokuthola imali imali yiloba nje iyingozi,” kutsho uNkkz Moyo.
Kulezinsuku kujwayelekile ukuthi abesifazane benze imisebenzi eyayandise ukwenziwa ngabesilisa kudala.
