uMthunywa
Cornelius Luphahla
SOKUKOMPUNZI idla emini eTennyson Hlabangana High School nanko phela abafundi balapha badakwa baze balale ebhawa le engemuva kwalesisikolo.
Abafundi laba kubikwa sebelesikhathi eside baqala ukunatha utshwala ebhawa le njalo esikolo lapha akulacingo okusuka kube lula ukuthi abafundi baphume bayezinathela utshwala babheme lembanje.
Intatheli ikhulumisane loMnumzana Lizwe Mangena oyisakhamuzi sakule indawo wathi abafundi laba basebenzisa izakhamizi ukuthi zibathengele utshwala besebezipha imali.
“Abafundi laba ikakhulu abakuFomu 1 lo 2 basebenzisa izakhamizi ukuthi zibathengele utshwala besebezipha eyinye encane ukuthi lazo zithenge obazo. Benza lokhu ngoba abavunyelwa ukuthi bangene ebhawa ngakho izakhamizi zakule indawo lazo zigangile sibili.
“Okunye njalo imbanje lezi abazibhemayo bazithenga kulezizakhamizi. Lokhu kuyinto embi kakhulu ngoba thina siyabe sisithi abantwabethu basesikolo kanti basebhawa,” kutsho uMnu Mangena.
Ekhuluma loMthunywa uNkosazana Sikhanyisiwe Nkomo uthe abafundi laba batholakala ebhawa le ikakhulu emini njalo okwenza baphume esikolo yikuthi akulacingo.
“Abafundi laba batholakala ebhawa le ikakhulu emini ngabo 1 okuyikho abaphuma bengathi bayakudla ezindlini zabo bona besiyanatha utshwala. Abanye babo bahle bengayi lesikolo bazigqokele impahla zabo bayenatha utshwala imini yonke.
“Okunye okudala ukuthi abafundi laba baphume bayenatha utshwala ebhawa yikuthi isikolo lesi asilacingo ngakho abafundi laba bayaziphumela nje calaceleni noma kusebusuku. Kuthi kunjalo umphathisikolo kanye lekomithi yakhe bayakubona ukuthi lokhu kwenza abafundi baphume lula njengoba lezindlu zabo ziseduzane lebhawa le elapha,” kutsho uNkszn Nkomo.
Omunye umfundi wakulesisikolo (igama silalo) uthe abanye balababafundi bayabe bedlala isinukha ebhawa le ngapho benatha utshwala.
“Abafundi laba ekuseni usiya sikolo ubathola bezidlalela isinukha eceleni kwebhawa le ngapha benatha utshwala.
Abanye babo basuka lotshwala lobu ebhawa le bayebunathela esikolo,” kutsho umfundi lo.
Ebuzwa ngale indaba uMqondisi wezemfundo edolobheni lakoBulawayo uMnumzana Dan Moyo uthe indaba le kakayizwa ngakho bazayihlolisisa bayilungisise.
“Indaba yokunatha utshwala kwabantwana beTennyson Hlabangana High School besingakayizwa ngakho sizayihlolisisa siyilungisise ngoba akuvunyelwa ukuthi umntwana wesikolo anathe utshwala,” kuphetha uMnu Moyo.
