uMthunywa
Musa Janga
ZISWELA lokuthi zicatshe ngaphi izakhamizi zeSigodini eNtabende kuWadi 19 ngosekusenziwa ngomahotsha kulesisigaba nanko phela kubikwa sebegeza esibholaneni emini libalele.
Omahotsha laba kubikwa sebelesikhathi begila umkhuba wabo lo njalo abakutshayi ngitsho indiva ukuthi nxa begeza bacatshe kodwa bazimela egcekeni bazigezele, kabahloniphi ngitsho labantwana abadlulayo nxa bevela esikolo.
Intatheli kaMthunywa ikhulumisane lesinye isakhamizi salapho esiziveze ngokuthi nguMaMoyo yena obike ukuthi linto silesikhathi isenzeka.
“Kulabomahotsha abagidayo njalo abathengisa imizimba ebusuku asebehluphile lapha. Omahotsha laba nxa sekukhanya bayahamba esibholaneni besiyageza, okubi yikuthi bayabe begeza bebhunyumunyu abantwana besikolo besedlula khonapho.
“Akusiphathi kuhle thina njengomphakathi ngoba kulihlazo ukuthi abantwana babone ubunqunu babantu abadala, aluba bagezela esibholaneni kumnyama bekuzakuba ngcono hatshi emini kaBha,” kulandisa uMaMoyo.
Uqhubekele phambili esithi isigaba sabo asiselasithunzi ngokwenziwa ngabomahotsha labo.
“Isigaba asiselasithunzi, lanxa uvakatshele kwezinye izigaba uzwa bekhuluma kubi ngesethu ngenxa yabantu laba. Abanye bakhona kayisibo besigabeni sethu, bavela kwezinye indawo kodwa babuya lapha ukuzohlambaza esethu. Kabadinge ezinye indawo lapho abazagezela khona,” kuchaza uMaMoyo.
Esinye isakhamuzi salapho esiziveze ngokuthi nguNjabulo Dube ubike ukuthi linto ayiphathi kuhle nje abantwana besikolo kodwa lamadoda asebenzisa indlela le.
“Lathi njengamadoda akusiphathi kuhle ngoba sithwala nzima ukuthi sisebenzise leyondlela nxa sihamba, sokumele sitshintshe indlela,” kulandisa uMnu Dube.
UMthunywa ubuye wakhulumisana losobhuku wakulesisigaba uMnumzana Luckson Mnkandla yena ovumileyo lesisehlakalo.
“Kuliqiniso ukuthi kulabosisi laba abahamba ebusuku abagezela esibholaneni sekusile. Sizama ngazo zonke indlela ukuthi sikhulumisane labo ngoba lokhu kusingcolisela isigaba.
“Sesibikele amapholisa ngalokhu ngakho sisalinde ukuthi sibone ukuthi benzani kodwa okwakhathesi abakenzi lutho,” kuphetha uMnu Mnkandla.
Isikhulumi samapholisa esabelweni seMatabeleland South uMnumzana Philisani Ndebele ubike ukuthi udaba lolu alukafiki kuye.
