uMthunywa
Johas Moyo
SEZIHLEZI zizidla amathambo engqondo izakhamizi zeFafi eZhombe eKwekwe ngenxa yamasela enkomo asezithanyelele izibaya okubikwa ukuthi azihlinzela endlini besenzela ukuthi umkhondo wazo ungaziwa.
Kubikwa ubugangi lobu bubhahe kakhulu endaweni engaphansi kwenduna uGwesela.
Kuzwakale ukuthi kuviki ephelileyo amasela la atholakale eqeda kuhlinza inkabi yesinye isakhamuzi kolunye unxuwa lanxa enelise ukubaleka.
UMthunywa uxhumane losobhuku wakule indawo uFaya Ndebele waveza ukuthi njengomkhokheli wahamba wayafika enxuweni okwakuhlinzelwe kulo inkomo.
“Asikwazi sibili ukuthi ngabantu bangaphi abagangayo lapha kodwa izakhamizi ezinengi sezicatshelwe zinkomo kodwa ngemva kokubonakala kwale ebisihlinziwe enxuweni kutshengisa ukuthi zonke ezicatshayo kazihlinzelwa egangeni.
“Mhlalokho okwaphambanisa izakhamizi ukuthi zilonde umzila wamasela la yikuthi izulu lasuka lana njalo kuleyondawo kucatshile,” kulandisa uMnu Ndebele.
Usobhuku uNdebele uqhubekele phambili ecebisa uzakhamizi ukuthi zisebenze ndawonye ukuze amasela la abanjwe.
“Siyazi ukuthi bakhona abanye bethu abahlala lamasela la kodwa kunzima ukuthi bawaveze kodwa ubusela lobu bungaphela nxa singadonsa ndawonye.
“Okunye okusidanisayo yikuthi inkabi ezinkulu yizo ezitshontshwayo kakhulu njalo bekungavamanga ukuthi kube lamasela enkomo lapha, lezo yizinto ezenzalakala kubo Ntingwe khatshana lathi.
“Sikhuthaza njalo izakhamizi ukuthi ziqaphele izifuyo zazo ngoba kukhanya lonyaka amasela akhona avuke ubunke,” kutsho uMnu Ndebele.
Omele isikhulumi samapholisa eNkabazwe uAssistant Inspector Mkwende uthe indaba yokutshontshwa kwenkomo zihlinzwa ezindlini bebengakayizwa kodwa bazachwayisisa ngayo.
