uMthunywa
Thokozile Mbezi
ABABONA ngezomumo womkhathi abeMeteorological Services Department (MSD) sebexwayise uzulu ukuthi kuzakuba lezulu elikhulu elilomdumo njalo eliphazimayo elizweni lonke jikelele.
Iyezi elembese izabelo ezibalisa koBulawayo kanye lendawo eziseMatabeleland kanye leNkabazwe izolo ebusuku kukhangelelwe ukuthi lisabalale lakwezinye indawo kusukela ngoLwesithathu ntambama.
Kubikwa endaweni ezinengi kuzakuna izulu eliphezulu kwesilinganiso se-30mm kumahola angu-24 kusukela ngoLwesithathu kusiya ngoLwesine mhlaka 12.
Kusitatimende sababona ngezomkhathi, uzulu uxwayiswe ukuthi angalingi achaphe imfula ingcwele ngoba lokhu kungaba yingozi.
“Qaphelani, nxa izulu lilomdumo kuhle ukuthi abantu bahlale endlini bangabi phandle. Abantu bayaxwayiswa njalo ukuthi bangacatshi ngaphansi kwezihlahla.
“Abatshayeli bezimota labo bakhuthazwa ukuthi baqaphele emgwaqweni ngoba kungaba lezikhukhula,” kutsho isitatimende seMSD.
Uzulu ukhuthazwe njalo ukuthi anathe kakhulu amanzi emini njalo bangabi selangeni kusukela ngehola lika 11 ekuseni kusiya kwelesithathu ngemva kwemini enkulu.
