uMthunywa
Thokozile Mbedzi
ABABONA ngezomumo womkhathi kuleli abeMeteorological Services Department bakhuthaza abalimi kundawana zonke zelizwe ukuba balandele izaziso zomkhathi abazikhipha kumabonakude, emsakazweni kanye lasebulenjini.
Intatheli kaMthunywa ikhulumisane loMnumzana Marimire Kwangwari ongu-seismologist, labo ababona ngezokuzamazama komhlaba, uthe abalimi kabalandele izaziso eziphuma kwabeMeteorological Services ezibonakala ngokuba lesidindo salinhlanganiso soqobo esiyiso esivikela abalimi kungozi zamanzi, iziphepho kanye lenkosazana.
“Abalimi kumele baqaphele kakhulu kuzaziso zomkhathi ngoba kulabantu abafaka izaziso ezingaveli kubo okucina kubangela ukuthi abalimi balahlekelwe yizilimo zabo nxa sekuthe kwenzakala inhlekelele zomkhathi.
“Abalimi kumele balandele izaziso esizikhipha kumabonakude kanye lasebulenjini kodwa kumele zibe lesidindo sogatsha lwethu olubona ngezokulima, ezomhlabathi lezomkhathi ukwenzela ukuba kungabi lamaphutha kumibiko yethu.
“Abalimi nxa bengela qiniso lesaziso kumele baxhumane lathi babuze ukuba umkhathi ume njani hatshi ukulandela izaziso abangalaqiniso lazo njalo ezenza balahlekelwe,” kutsho uMnu Kwangwari.
Uthe khathesi sisemqandweni kungakho-ke kuzaziso zabo bayabikela abalimi ukuze bavikele izilimo zabo.
“NjengeMeteorological Services siyazisa ukuba umkhathi unjani ukuze abalimi bavikele izilimo zabo njalo nxa kungabavunayo labo kuqakathekile ukuba babe kwazi ukuba umkhathi ozayo sebengavuna kumbe hatshi ukuze bengalahlekelwa yizilimo zabo.
Uqhubekele phambili njalo esithi ngaso sonke isikhathi bona kwezomkhathi bayahlangana njengezanuse zomkhathi ngenyanga kaNcwabakazi kumhlangano weSouthern Africa behlolisisa ngomkhathi wesizwekazi seAfrika.
“Ngemva komhlangano lo lapho esiyabe sihlangene khona sifika sethule imbiko kunhlangothi zonke elizweni kanye labezindaba ngendlela eqondileyo ukuze kwenziwe amalungiselelo afaneleyo.
“Kumhlangano lo sibapha umhlahlandlela wamalungiselelo okuba emadamu kungavulwa yini loba hatshi kusiya ngokuthi ngomnyaka lowo izulu linengi loba hatshi.
“Kungakho sixwayisa abalimi ukuba baqaphele njalo bathole izaziso ngaso sonke isikhathi ukuze bengalahlekelwa yizilimo zabo futhi labo bangabi sengozini zamanzi, iziphepho kanye lenkosazana ngoba inengi labalimi liyafa ngesikhathi besemasimini belima,” nguMnu Kwangwari lowo.
Uphethe ngokuthi abalimi bangabuzani emakhaya ngomkhathi kodwa kabadinge kibo mathupha izaziso zomumo eziqondileyo.
