uMthunywa
Langelihle Moyo
INHLANGANISO ebona ngezokulima eye-Agritex isikhuthaze abalimi ukuthi baqakathekise ukulima i-ginger ngoba yisilimo esiluncedo kumpilakahle kazulu futhi sisetshenziswa ukulungisa okunengi okungenza oyilimileyo azitholele inzuzo enengi.
UNkosaza Treggy Mpofu ongu-Horticulture Specialist koBulawayo uthe i-ginger isetshenziswa ukwenza okutshiyeneyo elizweni leZimbabwe okungalethela abalimi imali enengi. Uthe okunye okwenziwa nge-ginger bangakufunda bazenzele babe sebethengisa.
“I-ginger yenza into ezitshiyeneyo ezigoqela amanamunede, iziwiji, imithi yokukhwehlela kanye letiye. Okunye okuhle ngesilimo lesi yikuthi ingathengiswa iluhlaza lanxa isivuthiwe.
“Umlimi sengafunda ukwenza okutshiyeneyo ngokubukela ebulenjini athengise lokhu enelise ukukwenza. Umlimi nxa angalima kuhle isilimo sakhe se-ginger uyakhanga amanye amabhizimusi asebenzisa isilimo lesi ukwenza impahla ezitshiyeneyo abayithengisayo ukuthi bathenge kuye,” kutsho uNkszn Mpofu.
Uqhubekele phambili elandisa indlela umlimi angazilandela nxa elima i-ginger.
“Okwakuqala nxa umlimi elima i-ginger kufanele ananzelele ukuthi umhlabathi akhethe ukulima kiwo kawomanga ngoba owomileyo wenza isilimo lesi singanabi kuhle ngaphansi komhlabathi.
“Umlimi angasebenzisa amajodo awesilimo esidala. Kufanele asikelele abe mancane. Nxa umlimi esehlanyela kufanele abone ukuthi seziqala ukumila. Kuthi-ke nxa esegqibela kumele afake mbijana inhlabathi engaba yi-2cm.
“Umbheda wesilimo lesi kufanele ube yi-15cm kusiya ku 30cm besekusithi nxa esehlukanisa isilimo sinye ngasinye kufanele sehlukane nge-20cm.
“Phakathi laphakathi komfolo kufanele kube yi-30cm besekusithi phakathi komfolo kube yi-25cm. Isimilo se-ginger sifuna umkhathi ophakathi kwe-18 kusiya ku-30 degrees besekusithi ubumunyu bube yi-5,5 kusiya ku 6,5,” kulandisa uNkszn Mpofu.
Uphethe ngokulimukisa abalimi ngezibungwana ezihlasela isilimo lesi langendlela ezingalwiswa ngayo.
“Kulezibungwana ezivame ukuhlasela isilimo se-ginger. Umlimi angasebenzisa i-carbofuran engaba yi-3kg ngemva kokuhlanyela i-ginger ukuze avikele izibungwana lezi. Isilimo lesi sivunwa nxa amahlamvu setshintsha umbala esesiba lithanga, esewoma njalo umlimi kufanele agezise isilimo sakhe nge-sodium hypochlorite lamanzi ukuze sihlanzeke,” kuphetha uNkszn Mpofu.
