uMthunywa
Silo Mehleli Dube
KWATHI mhla kudlule omunye umdala wami uKheswa kwaqhamuka izihlobo labangane zivela kumagumbi onke omane omhlaba, eduze lakhatshana.
Kwakuyindoda emadodeni, zidlana uboya, kutshetshwa ngomhluzi wenye, ngitsho labantu abeza emngcwabeni babesazi mhlophe ukuthi loba belahlekelwe kodwa inyama babezayidlithiza ize ibatshaye inhliziyo.
Phela kwahle kwabulawa inkunzi isikhumba sayo yiso esasizagoqela ibhokisi, inkabi ezimbili zingezesitshebo. Ngobunengi babantu wawungacabanga ukuthi mhlawumbe kufe usaziwayo kwezombangazwe.
Abantwabakhe abaseNgilandi leGoli baphanga bafika befuna ukuzozibonela uyise ebekwa endlini yakhe yokucina. Owayethenge ibhokisi ngenye indodana yakhe eyethiwa igama elithi Bongumusa.
Lalapho uKheswa esenza imisebenzi yakhe yangekhaya wayengeke akhuluma aqeda inkulumo yakhe enganikanga isibonelo ngendodana yakhe. Nxa ungatshelwanga ukuthi wayelamanye amadodana amabili wawungacabanga ukuthi nguye yedwa.
Laye ekudluleni kukayise wamthengela ibhokisi elalibucwazicwazi ungeke utsho ukuthi yinto ezagqitshelwa emhlabathini. Ngezwa omunye ubaba ebabaza ubuhle bebhokisi ephumisela ethi ukuzala yikuzimbela. Into eyasuka yathithibalisa abantu, uBongumusa wayeselama odadewabo abathathu enguye izibulo ebafaneni eselanywa ngabafowabo ababili.
Kwathi sekumele akhokhele abafundisi ephethe intonga kayise sekuyiwa endlinzeni elalingemva kwesibaya senkomo, abafowabo bakaKheswa bakhetha ujaha wesibili ngoba bethi uBongumusa wayengasinzalo kaKheswa labanye abantwana babekwazi, asazi kumbe babetshelwe ngoyisekazi kumbe babebona ukuthi yena wayengafanani labanye nanku wayemhlophe elesiphundu esicijileyo.
Loba into yamkhuba kodwa njengendoda zawela esifubeni ezakhe inyembezi wekela umngcwabo wedlula, ecabanga ukuthi mhlawumbe yintando yomdeni. Uthe esekudingisisa waqala ukubuza umalumakhe, phela ofuna ukubona indwangu uya entabeni, umalumakhe loba kwakulukhuni ukuthi amtshele iqiniso kodwa inkonyane yayisiwucithile umuthi ngokumalela kwabo ukuthi aphathe intonga kayise njengokwenziwayo ngesiko lesiNtu.
Wamchazela ukuthi kasimntakaKheswa, wasemtshela ukuthi sikhona isikhathi uKheswa adliwa zindunduma yiso isikhathi azalwa ngaso kodwa uKheswa kazange asola umkakhe, babuya bazala abantwana kungani akwenzekanga lutho.
Kwathi ngelinye ilanga esebuza unina kazange amphendula wabihla njalonje, waze wathi khonokho okutshelwe ngumalumakho akuselaqiniso elidlula lelo.
Okwaba buhlungu yikuthi loyise omzalayo wayesewatshona, unina laye wayengazange ahambe kulowo mngcwabo wayezwe ngabasiki bebunda.
Umbuzo wokucina awubuza unina ngowokuthi isikhathi sonke lesi mama ungangitsheli iqiniso wawuthi kuzaphetha ngani, wehluleka ukuphendula unina wabihla okwengane ephandlwe luchago lwesihlahla sengotsha.
Yikho isiNtu sisithi okulempondo akufihlwa emgodleni.
Ayixabene
