uMthunywa
Cornelius Luphahla
BAKAMALANDELA angithi nje isigaba lesigaba somnyaka siza lezazo indaba ezijabulisayo lezibuhlungu. Kunjalo-ke lakhathesi sesifikile isikhathi somqando abanye bayasesaba abanye bayasijabulela kuthi abanye basibona sifana nje lazozonke insuku.
Angithi nje kuqala intwasa lokuhlumisa lokutshisa okukhulu okuncibilikisa imithofi ematsheni wale ubheje ukuthi uzafa wabuya uMalamulela indoda yakoZulu elemilenze emide. Kusenjalo idede kancane intwasa ihlumise izihlala kungaziwa lokuthi amanzi okuzihlumisa iwathethe ngaphi njengoba engakafiki uMalamulela kanti yikuthwasa kwehlobo.
Nanso inyamalala intwasa idedela ihlobo. Lalo liza lezalo zitshaye inhlambi zezulu kujabule ngitsho lentethe etshanini. Iguquke imvelo ubalazwe umhlaba ube luhlaza tshoko uzwe kubetha umoya omnandi okwamagama.
Kusenjalo lidedele ikwindla lalo liyitshaye eyalo ingquzu bazitike abantu ngezithelo langezilimo bakithi izisu gebhu nsukuzonke.
Besaphakathi kwenjabulo yekwindla leli nantiya lisolobela kancane litshiyela umqando. Yiso-ke isikhathi esikhuluma ngaso esithwalise nzima uzulu. Uthola abantwana betshayanisa amazinyo benamathele imiduli okompankwa uqobo.
Injalo impilo, kusinwa kudedelwana.
Zinengi-ke ingozi ezenzakala ngalesisikhathi ngenxa yomqando njengoba nje abantu bayabe bezama ukuzikhudumeza. Emakhaya nxa kunje abafana lamankazana kabasuki emlilweni imbale lazo zithi woza sihambe.
Uthole umfana semabalabala imbala lemilenze sokungokunye. Amantombazana lawo ayabe sevalwa lisiko kuphela yikho nje imbale lezi ziyabe zingakhanyi lapho eziphelela khona.
Yikho-ke okutsha khona abantwana lapha ngoba nxa umlilo usalumatha usanda kubaswa bazabe befuqana kungela ofuna ukungalizwa ikhoza lawo. Ekufuqaneni lapha omunye ucina ewela eziko kumbe setshiswa yimbiza eseziko.
Yizo-ke ingozi okufanele sizenqabele ngalesisikhathi.
Lezingozi kazenzakali emakhaya kuphela kodwa lemadolobheni zikhona njengoba lakho kuqanda njalo lomlilo lo uyathengwa. Abanye babethi nxa kuqanda kanje bathathe imbawula bayithi ngxi endlini lemuli bavale bavitshe indoda yakoMqando nxa ithi fuqaqa ithole kungangeneki inxaphe idlulele phambili.
Ngenxa yokuvala lokhu lembawula lezi ezafikayo abantu basuka baswele umoya wokuphefumula bethi nxa bephaphama sebengaselamandla ngoba sebephefumule umoya wembawula ongalunganga. Kwesinye isikhathi bahle baphelele endlini bonke bengasavuki. Ngalokhu kuqakathekile ukuthi nxa ufake imbawula endlini utshiye izikhala zokungenisa umoya endlini ukuze ungafeli endlini.
Kwabatsha-ke yiso isikhathi esiyingozi kakhulu lesi asazi ukuthi basuka bangenwe yini. Uthola umntwana engasalali endli selala emajaheni asazi ukuthi umqando ubaphambanisa ngani. Yikho ngesikhothi sentwasa inengi lamantombazana libonakala selizithwele.
Njengoba abadala bethi impi ivinjwa isasekude, ivimbeni-ke bazali impi le ehlasela abantwabenu ngalesisikhathi.
Nanzelelani njalo ezinye indaba ezimbi eziza lomqando emulini zenu ukuze zingaze zalihlasela.
