uMthunywa
Cornelius Luphahla
BAKAMALANDELA angithi nje nxa insuku zisanda iminyaka iyedlula layo. Nanku-ke ngokuhamba kwensuku akusasalanga nsuku zingaki singawelanga ngaphetsheya komnyaka lo esikuwo sayaganywa ngozayo.
Injalo impilo ngakho kakho okwaziyo ukuthi umnyaka lo uza lani kumbe uza lenhlungu zodwa. Lokhu kwaziwa nguMvelinqangi thina abenyama sizakwamukela okuvela kuye ngoba singelawo amandla okukuphikisa.
Abadala babethi iminyaka itshiyene kukhona umnyaka oza lendaba ezimbi kuphela uze uyephela kuthi omunye uze lenjabulo kuphela.
Lokhu-ke ngeke sabakwazi ngoba akwaziwa ukuthi umnyaka yiwo oza lezindaba lezi kumbe umumo yiwo odala lokhu. Kwesinye isikhathi umuntu engathi umnyaka uze lezimnandi waze wayaphela kanti komunye bekuzinsizi zodwa.
Njengoba kusiza usuku oluthandwa ngabantu abanengi olomnyaka omutsha kuqakathekile ukuthi uzulu alujabulele ngendlela elokunanzelela ngoba lalo luvame ukuza lendaba ezimbi. Kwakuthi umuntu engehlelwa yisiga ekuqaleni komnyaka abaziyo bathi uyaze uyephela esensizini.
Njengoba nje kusazakala ukuthi ngalezinsuku abanye balaluka sebesemajele ngenxa yokwenza imigqa ethile ngakho kuhle ukuthi uzinanzelele ungaze waba ngomunye wabanjalo. Phela abanye bathi kabajabulanga kuhle basuke basongele ukujabula ngosuku lomnyaka omutsha.
Nxa kubenjalo-ke inengi labanjalo lisuka lehluleke ukuzikhuza lijabule kuze kweqise. Yikho phela othola umuntu esezibona ekuseni engazange wabona ukuthi kuhambe njani ubusuku bonke.
Kuyingozi enkulu lokhu ngoba abanye bavuka bekhuthuziwe batshontshelwa kanye lezithupha bengaboni lutho.
Abanye ngikhuluma nje kabasoze bayewela emnyakeni lo ngenxa yokungaziphathi kuhle.
Kukhona njalo abazathathwa nguMdali kungakafiki umnyaka lo omutsha kodwa ngithi kulabo abalesifiso sokuphila ngokuthula kabahlale beqaphele ukuze bengaze bangena ezilingweni.
Kunjalo-ke bakaMalandela labo abazenelisa ukufika emnyakeni omutsha bengabaphilayo kuqakathekile ukuthi bakujabulele lokhu babuye bambonge uMvelinqangi. Yikho-ke ngikhuthaza ngokuthi bajabule ngendlela elokunanzelela okubanzi.
Lani bafundi lingaze lalibala ukuthi lisaqhubeka ngezifundo njalo ngoba lingamane lijabule likhohlwe ngempilo lizakutsha okamazokhela. Ngikhuluma lokhu ngoba ngosuku lweKhisimusi abanye bahle baphelela emajele kuthi abanye bahle baphelelwa yimpilo.
Laba abaseleyo kubontanga kabananzelele njalo bengahambi ngonyawo oluhambe ngabanye babo abehlelwe zingozi ngoba inengi lalezingozi ontanga bayazidinga ngokungalaleli kwabo.
Ngokunjalo kulabo abathanda ukuzithokozisa ngamanzi amponjwana kusuka kube nzima ngoba yibo abavame ukuwela ezingozini ngoba sebephandliwe.
