uMthunywa
Kwathi mzukwana kuzwakele ukuthi uGezephi akasekho, babemsusele amanqe abangane bakhe eGoli.
Wayengumgulukudu wesigebenga, isidlova uSathane olempondo uqobo lwakhe. Wawuzwe abanye nxa bemnyeya baze baphumisele bathi lenhliziyo akaselayo wayikhupha wayiphosela elwandle ngenxa yokuthi kuye ukuchitha umphefumulo womuntu wayengakuthathi mango.
Kahle kahle wayeyisiphala solwazi sabo bonke bugebenga ongabucabanga. Wayethi angaganga lapha kwelakithi abaleke ayecatsha eGoli, khona wayengacatshi kuphela uyabe eqhubeka ngemisebenzi yakhe emibi yokudlwengula, ukubulala lokugqekeza.
Wayethwala lombhobho, isimanga kazange ake abe lisotsha, ukuthi wayefundiswe ngubani ukusebenzisa inkafulakufa kwazi yena, ngikhumbula kuthiwa amapholisa eGoli ake amvimbezela emkhukhwini kodwa wawadubula wonke eyisikhombisa waphunyuka.
Ekhaya lapha wayegqekeza ezitolo ezithatha imali zabantu kungabindaba zalutho. Unina wawuzwe ethi kungcono ayekwenzela ubunyamazana bakhe eGoli ngoba lapha ekhaya kwakumxabanisa labantu.
Phela wayesekhuze waze wadela umuzwe esesithi yena kazalanga wabola amathumbu aze afise lokuthi ngabe wahamba empini yenkululeko wayasala khona ngabe lolu dubo kaluboni.
Njengoba isitsho sabadala siyatsho ukuthi akuqili lazikhotha emhlane njalo kwelinye ilanga indwangu iyalukhutha ugatsha lesotsha lifela ebusotsheni, lafika ilizwi lokuthi udutshulwe ngabangane bakhe eGoli ayetshontsha labo esesala lemali yonke ababeyigqekezile bonke, bavela bamsusela amanqe, bamsakaza ikhanda ubuchopho bagcwala phansi batshaphazeka ungani ngamatshe ezulu lesiqotho.
Unina wathi ekuzwa wezwakala ethi bengihlala ngimtshela ukuthi lencwadi eNgcwele iyakufakaza ukuthi hlonipha uyihlo lonyoko ukuze insuku zakho zande ezweni njalo ilizwi lomzali alitshayi phansi.
Kwathi ngelanga lomngcwabo abantu babebanengi empeleni enhliziyweni zabo bethabile njalo ukuza ngobunengi babefuna ukuzozibonela ukuthi ngempela umgulukudu usuhambile okungaphendukwa khona.
Njengoba kuthiwa ofileyo akukhulunywa ngaye kubi ngoba kuvala indlela zakhe, uthe umfundisi eqeda ukufaka umthandazo wathi uGezephi yindodana eyayilunge kakhulu, laphakama ikhehla eselimpunga uKheswa lathi hoo mfundisi mana kancane, tshela abantu iqiniso, “Lujaha esimbeka lapha ubeyisinengiso, asigqibeleni sambeni,” kwezwakala imvokloklo lemipululu kukhombisa ukuthi ukhulume into ejabulisa umphakathi.
Ayixabene.
