uMthunywa
Cornelius Luphahla
Sizwe sikaMthwakazi kade ngihlala ngiyiziba indaba yabakhunkuli asebehlala beyingxoxo yansukuzonke ngithi mhlawumbe bazazinuka amakhwapha kodwa kanti ngikhe phansi. Namhlanje ngiqonde ukuqothula imbokodo lesisekelo angitshiyi lutho ngoba ongakhaliyo ufela embelekweni.
Ngethuba okhokho besaphila kwakuthi nxa umuntu ebanjwe ekhunkula abhukudwe ajuqwe kungabi ndabazalutho.
Yikho nje kwakungavamanga ukufa kwabantu kanye lezigigaba esizibona kulezinsuku.Ngempela baqinisile abadala ukuthi ilizwe lalakhile.
Angithi nje loMqengwana owayesekhwapheni lenkosi kwathi ngemva kokuba izanuse zenkosi uMzilikazi zithe nguye othakatha inkosi waxotshwa elizweni noma nje wayeliqhawe elikhulu wayahlaliswa khatshana. Angikhulumi ngoLukukusi owayethakatha ngempondo ezazivala izulu koMthwakazi, indaba kayise owasuselwa amanqe ngenxa yobuthakathi bakhe. Angithi kwathi ngemva kokuba inyanga yakoGasa sizivumbululile amadoda ayefuna ukumudla engamsuthi waphuma emlonyeni wesilwane.
Ngeqiniso Mthwakazi lokhu kuyisifundo esikhulu sokuthi ubukhunkuli buvele buyinto embi njalo babungavunyelwa lakudala. Baqinisile abadala nxa bethi okukhulu akulamkhosi, nanku ngikubona ngawami la. Kade sizizwa izinto kodwa okwalezinsuku kukhulu kungangoTshaka qiniso.
Noma nje izinto zazisenzakala kudala kodwa okwakhathesi kungiqeda amandla. Kambe kukhona umuntu ophilayo sibili ongafuya inyoka esicathulweni kumbe inkalakatha yendwangu ethi ngeyokumnothisa?Asazi bakaMthwakazi, ngokubona kwami selidumela emansumpeni qiniso.
Ensukwini ezadlulayo sasisazi ukuthi ubukhunkuli lobu benzakala kakhulu emakhaya kodwa khathesi sesibubonela emadolobheni njalo sobusenziwa ngabantu abatsha kakhulu. Ngeqiniso nxa laba abakhipha inyoka lezi labondofa bengangena emadolobheni kakho ongathanda ukuyavakatshela khona ngoba kungaphuma okwedlula esiyake sikuzwe.
Isimanga yikuthi inengi labakhunkuli laba liyazihawulela angazi ukuthi ubuthakathi lobu bubanceda ngani njengoba bezidlela ingqweqwe zomlomo. Labo abanothiswe yizinanakazana lezi bathwalisa nzima abantwana ngoba uphetha ebulewe yizo zisale njalo zihlupha abantwana abangelacala.
Njengoba nje sesihlala sisizwa izigigaba ezesabeka kangaka kambe ngubani ongathandabuza ukuthi sokuzinsuku zokucina ezihlala zikhulunywa ngabafundisi ezinkonzweni? Kunjalo bakwethu, ungabona umfumfu ununkula, intakubomvu zithela lamangabuzane endiza kawuthandabuzi ukuthi ihlobo lisondele, uyathwasa umnyaka.
Isimanga yikuthi abantu basuka bebabaze abakhunkuli abahamba ebusuku belibale ukuthi bakhona njalo abakhunkula lemini ngenxa yezenzo zabo. Laba bagoqela amasela kanye labadlwenguli. Ngitsho ngoba endulo wonke umuntu owayesenza iziga ezifana lalezi wayebizwa ngelobuthakathi ngoba esenza izinto ezimbi.
Lokhu kusobala ukuthi umuntu onjalo engathola umuthi wokubulala kambe engekela njalo ukukubulala yena esenelisa ukubulala umuntu ngokumgwaza kumbe ngezinye indlela? Mthwakazi omuhle kasiguqukeni sifane labokhokho bethu bayizolo ukuze sakhe isizwe sethu.
