uMthunywa
Zintatheli zikaMthunywa
ZIZONDE ziganu unwabu izakhamizi zeSt Elizabeth eMbembesi kulandela ukufika kwabohlangothi olubona ngezenyamazana zendle iZimbabwe Parks and Wildlife Management Authority bezohluthuna inyoka obekucatshangelwa ukuba ibisetshenziswa ngesinye isakhamuzi kumisebenzi yobuthakathi.
Izakhamizi lezi zifunga zigomela ukuthi ziyawufuna umgobho lo ngoba yiwo obangela ukuthi kungabi lezulu esigabeni kungakho zifuna ukuwutshisa.
Umgobho lo uvunjululwe ngabaphurofethi abasesigabeni lesi akade belande ukuzosihlanza. Ukudonselana kwezakhamizi kanye labe-Parks umgobho lo kwenzakale kuviki ephelileyo ngoLwesithathu.
Ekhuluma lentatheli esinye isakhamuzi sakule indawo uNkosazana Sibonginkosi Ndlovu uveze ukuba kabathabanga ngitsho ngomgobho owathathwa ngabe-Parks.
“Inyoka le izilelwe amalanga amanengi ukuthi ibanjwe yayabanjwa eMafa le umnikazi eyibalekisa.
“Ithe isibanjiwe sabona thutshu abe-Parks sebezoyithatha, asazi ukuthi babikelwe ngubani ukuthi kulenyoka ebanjiweyo.
“Umgobho lo sifuna ukuwutshisa ngoba umnikazi mhlawumbe angaqhubeka ewusebenzisa ngoba uyaphila,” kutsho uNkosazana Ndlovu.
“Aluba kuyenza sifisa ukuwulandela siyewuthatha ngoba nxa singasawutshisanga kutsho ukuthi inhlupho zethu ngeke ziphele. Sikhuluma nje bathi inyoka le isiwe eHwange nanko-ke sizwa kuthwa kube lezikhukhula khonale engxenye yiyo ebangele lokho,” kubika uNkszn Ndlovu.
UMthunywa ubuye wakhulumisana loNkosazana Arthur Nkomo oveze ukuba inyoka yabo bayayifuna.
“Lapha abeParks basetshenziswa ngumnikazi wenyoka esazi ukuthi bazayithwala bahambe layo inyoka yakhe yena ayilandele ayithathe ayibisele eMbembesi.
“Basithola sihlezi bafika bangena izindlu zonke bethi badinga zonke inyamazana zasendle ezigcinwe lapha okuveza sobala ukuthi kukhona owayebatshelile ngakho. Asazi ukuthi iyozala nkomoni njengoba abantu sebekhukhulwa lizulu lapho abayisa khona.
“Sabekela bathatha inyoka lanxa sasingafuni layo ngoba bona basebesebenzisa umthetho ukuthi bayithathe,” kubika uMnu Sibanda.
Ekhuluma lentatheli usobhuku wakule indawo uMnumzana Mpikitsha Tshuma uthe inyoka kayiphenduke loba kanjani.
“Inyoka le yathathwa ngabomthetho siyavuma, kodwa siyayifuna iphenduke lapha itshiswe siyikhangele ngoba izasihlupha ngokuya kwesikhathi,” kubika uMnu Tshuma.
Intatheli iphinde yakhulumisana lomunye wabaphurofethi bakule indawo uMaDlamini ovumileyo ukuba inyoka yathathwa.
“Bafika abomthetho baphakamisa zonke impahla bathi bazwe kuthiwa ngigcina inhlathu bathatha umgobho ebesiwubambile bahamba lawo. Engingakutsho yikuthi inyoka le nxa bekade beyifuna bekumele bacele kuhle lathi siyenze umkhuba wakhona bayithathe kuhle hatshi ngodlame,” kuphetha uMaDlamini.
