uMthunywa
Ethel Ncube
INDUNA yeSilobela Umalisa isiveze ukukhathazeka kakhulu ngamacala okubulala alokhe esanda esigabeni sayo.
Induna le ibike ukuba endaweni yayo akupheli izinyanga kungelamuntu obuleweyo kumbe osebulele kumbe otshaye omunye njalo amacala la lokhe esanda.
Ikhuluma loMthunywa induna uMalisa iveze ukuba isiqale ukusebenzisana labanye lezinye inkokheli zesigaba eziseduze ukuze bahlanganise amakhanda baphume lamasu angabasiza ekulwiseni ukwanda kwamacala.
“Amacala okubulala lapha kithi manengi njalo kuyasikhathaza ukuthi kungani lokhu kusenzakala njalonje.
“Esikhathini esinengi siba lohlupho nxa kuthe kwaba lecala elithize elidaliweyo ngoba inkamba yamapholisa ikhatshana okwenza kubenzima ukuyabika emapholiseni nxa kubelesehlakalo esidinga wona.
“Kwezinye izikhathi abantu bacina besiza kimi ukuzocela imota, besengibathwala ngibasa emapholiseni.
“Okungikhathazayo yikuthi asikabi lesixazululo nxa kusiza kumacala. Sizadinga amacebo okwehlisa inani lamacala ayenzakala lapha esigabeni, ikakhulu awokubulala.
“Ngabiza ezinye inkokheli zesigaba ezigoqela osobhuku sahlala phansi sahlanganisa amakhanda savumelana ukuthi kungaba lomuntu osedale icala kalingapheleli emoyeni kodwa kalibikwe umuntu athole isijeziso sakhe esimfaneleyo ukuze angaphindi ukudala icala elifanayo,” kubika induna uMalisa.
Uqhubekele phambili echaza ukuba ukuqedwa kwamacala la ezigabeni kungehla nxa uzulu laye engaphatheka kumizamo yokwehlisa inani lamacala la.
“Ekuzameni ukwehlisa inani lamacala la ikakhulu awokubulala akungabi zinkonkheli zodwa eziphathekayo kodwa labantu nje jikelele kabazinikele ukuthi bazaphatheka kumizamo yokwehlisa inani lamacala la.
“Izakhamizi lazo ngifisa ukuzikhuthaza ukuthi nxa kulomuntu owonayo kaziphangise zibikele inkokheli zesigaba okuyizo ezizabona ukuthi zingamphatha njani lumuntu kumbe zimuse emapholiseni.
“Amacala akumelanga afihlwe ngoba siyabe sikhuthaza izigebenga ukuthi ziqhubeke zisenza okubi. Ophambanisileyo kajeziswe masinyane ukuze kungabi lokumemetheka kwamacala. Kubi kakhulu ukufihla isigebengu ngoba kusasa sizaphendukela wena,” kuphetha induna.
