uMthunywa
Kule iviki sizaxoxa ngabafundi okuyilapho engiphethe ngikhona kuviki edluleyo ngisithi mina, phambili ngemfundo, izidakamizwa lokungezwa — hatshi.
Intsha yiyo esengozini yokuzama lokhu lalokhuya (experiments) empilweni. Akukho okumayelana lempilo lokukhula komuntu okutsha emhlabeni.
Yikho abadala bethi indlela ibuzwa kwabaphambili ngoba yinye kuphela kusukela ekudalweni, ekuzalweni kuze kuyefika ekufeni.
Pho-ke, impilo yobutsha yona ingazanywa-zanywa kanjani? Kusengqondweni yosakhulayo kuphela ngoba kulenguquko ethize emzimbeni wakhe kumbe uyengwa ngomunye.
Kodwa, lapho ayakhona kunye, endleleni yethu sonke. Yikho sisalana lezidakamizwa lokungezwa ngoba sisazi ukuthi akumsizi ngalutho osakhulayo.
Izidakamizwa ezihlupha abantwana ngezigoqela imbanje, glue, bron cleer “bronco”, imihlobo yonke yotshwala lokunye okunjalo okuphazamisa ingqondo lemizwa yoluntu.
Umuntu odakwe ngaleyondlela uzibona sengani useZulwini yena ecanda indlela yaseGehena!
Yeyi madoda, ezulwini kukhatshana bakwethu. Bantwana besikolo, lingakuqali ukusebenzisa izidakamizwa ngoba; kulicala, kuyisono njalo kulihlazo.
Kawuhubi kahle ezifundweni, kudalisa amacala, kuthelela ukungezwa lobuqholo njalo kubulala ikusasa lentsha.
Ukungezwa esizaxoxa ngakho lapha ngokugoqela amadlwane alokuganga kwezocansi, ukudelela abazali lababalisi, ukweba amabhuku lamapenseli abanye, ukulwa, ukusebenzisa omakhalemkhukhwini kuyiwa ebulenjini, ukubuka imifanekiso yezocansi (pornography), lokudala amacala abanye bethembe ukuthi basesebancane kumbe ngokungazi / ngephutha.
Izidakamizwa ziyimihlobo eminengi egoqela ezilinywayo, eziphekwayo lezihlanganiswa ngemitshina ethize ikakhulu embizeni zezigelekeqe ezipheka izidakamizwa lezo nsitha. Inengi labanye abantu abadala liguqula imithi yezibhedlela liyenze izidakamizwa ngakho thina njengamapholisa esizwe, sibamba wonke umuntu otholakala elomuthi wesibhedlela kumbe okunye okunjalo okungakhanyisisi kuhle kodwa sikwazi ukuthi yizidakamizwa. Imithi yonke lamaphilisi ezibhedlela kumele kube lephepha kumbe ikhadi okulotshwe ngumongikazi, umongi kumbe udokotela (prescription).
Nxa belipha kumbe ukulithuma abadala labo, yalani ukubamba kumbe ukusebenzisa elingakwaziyo banawami. Lina bantwana besikolo, sifisa likhule kuhle libe lekusasa elihle.
Likhokhele, libe ngodokotela layo yonke eminye imisebenzi kanye lokufeza izipho zenu ngokufaneleyo.
Abantwana abangamankazana yibo abathwala nzima.
Bathi bangaya kukhefu lesikolo, inengi labo kaliphenduki.
Sithi amhlophe kini lonke ngoba liphendukile mantombazana.
Phela abanye ngabayabe sebezithwele kumbe bewelwe zingozi ezithile ezinye zakhona zingeziqhamuka ngenxa yokusetshenziswa kwezidakamizwa. Emidlalweni kumbe amadili athile, amanye amankazana uwathola esetshitshimba ecece aphelela ececela ukuyanatha lokubhema, ukudla abangakaze bakubone emizini yabazali babo kumbe izihlobo.
Okwenzakala ngemva kokudakwa kunengi bakwethu. Kasigcineni abantwabethu laba, ikakhulu abangamankazana.
Lina lani mankazana lingabona abazali lezihlobo kumbe omakhelwane beliyalisa lokhu lalokhuya, yazini ukuthi bayazi ukuthi kuyingozi.
Vumani ukulaywa lokuxwayiswa ngoba indlela ibuzwa kwabaphambili.
Sisesekhonapho kwabesifazane, silokudana okukhulu bakwethu ukunanzelela ukuthi kulabanye benu bodadewethu okubikwa babulawa ngabalandeli bakaSathani. Umoya omubi mubi bakwethu njalo uziveza ngobubi bawo.
Wehlukene loMoya oNgcwele!
Ungena umuntu lokumkhonzisa ebubini, akholwe, agcwalisele! Qaphelani. Ngobunye bobunzima obubhekane labodadewethu kunye labonondindwa. Ukwenda lakho sokunzima ngoba akusaziwa ukuthi lokuqomisayo ujongeni.
Pho nxa udakiwe nkazanandini kumbe “sisinyana,” ungakumela yini kumbe ukukunqoba lokhu osokulethwa nguSathani phakathi komphakathi? Yebo ye, ingozi, amashwa lenkinga kumbe indubo / inhlupho kumane kuqhamuke nje kusiwele.
Angithi lalo icala kuthiwa lembula ingubo lingene?
Kasiqapheleni bakwethu. Ikakhulu abantwana.
Khulani lihlonipha, lilalela kanye lokulandela izixwayiso lezilayo zabazali kunye labo bonke abanye abalixwayisayo.
Izitshengiso zokungezwa ziqala ukuvela umuntu esesengumntwana. Angithi kuvele kunjalo ngoba umthwentwe uhlaba usamila.
Sikhuthaza ukuthi abazali bananzelele abantwababo besesebancane, babalaye ngokufaneleyo.
Lapha sizama ukuzibamba zisengamaphuphu bakwethu. Bantwana bezikolo, lindani likhule ngoba ubude kabuphangwa. Lingagijimela imbukiso yezakocansi kubomabonakude labomakhalemkhukhwini, sizalibopha.
Ukubotshwa kungalikhutha, lizagula kumbe ukufa ngemikhuhlane yengulamakhwa ngoba banengi abadala abalilindeleyo.
Lingazifaki ezilingweni banawami ngokusebenzisa izidakamizwa lokwenza ukungezwa okubalisela amadlwane alokuganga kokuhlangana kwezocansi, ukudelela abazali lababalisi, ukweba amabhuku lamapenseli abanye, ukulwa, ukusebenzisa omakhalemkhukhwini lisiya ebulenjini, ukubuka imifanekiso yezocansi (pornography), lokudala amacala abanye bethembe ukuthi basesebancane kumbe ngokungazi / ngephutha.
Khona lokhu okubukeka sengani yikungezwa nje komntwana, yikho okucina kukhula kusiba ngumkhuba wokona ophetha usuyibugebengu kumbe isibindi sokwephula umthetho.
Siyabonga bakwethu ngokubala izindatshana zethu sisakha ikusasa elihle labantwabethu sisonke.
Ngithemba balutshwana abazali abalokhe bevikela abantwababo abonayo, ngesikhathi bekhuzwa ngabanye abantu.
Sidibane kuviki ezayo.
Lingakhohlwa ukuthi, ku-04-700171-9 Extension 3193; 0735752386 / 0716616987 / 0783185092 kumbe ebulenjini [email protected] <mailto:[email protected]>, [email protected] kumbe [email protected] – yikho lapho elingithola khona.
