uMthunywa
YiNtatheli Kamthunywa
OSOMABHIZIMISI beGwanda ababili sebesungule uhlelo lokubuyisela abakutholayo emphakathini ngokuthuthukisa abafundi abasezikolo ezikulindawo.
UMnumzana Philisani Ncube loMnumzana Yenzani Dube abangosomabhizimusi abaphatheka kwezokwemba njalo abalezakhiwo kudolobho leli sebezinikele ukuthi bazanika izikolo eziyisikhombisa amaphephandaba.
UMnu Ncube ongumnikazi wemigodi emithathu, lenkampani ebona ngezokuhamba (transport) kanye lezakhiwo edolobheni leli uthe ezemfundo zimqoka ekuthuthukiseni ilizwe.
“Nginakane ukuthi ngingene kuhlelo lolu lokuthengela izikolo amaphephandaba ukuze sibe lesiqiniseko sokuthi abafundi bahlala besazi okwenzakala emhlabeni wonke jikelele kanye lokuthi bahlale bengabantu abazi njalo abakukhwabithayo ukubala. Kungumlandu wethu njengabosomabhizimusi ukuthi sibone ukuthi abafundi baphiwa ulwazi njengoba beyibo abakhokheli bakusasa,” nguMnu Ncube lo.
Uthe ulombono wokubona iGwanda ithuthuka kwezamabhizimusi. UMnu Ncube uthe wasungula ibhizimusi lakhe ngomnyaka ka-2010 eleminyaka yokuzalwa engu-20.
UMnu Ncube uthe ukhangele imigodi ethi Little Abercorn, Horn West kanye leMvana Mine.
UMnu Dube ophinda abe ngumgcinisihlalo wenhlanganiso yeGwanda Small Scale Miners Association uthe ugatsha lwezokwemba lilakho ukuthuthuka ngendlela emangalisayo.
Uthe ugatsha lolu lumqoka ekuthuthukiseni idolobho leGwanda. UMnu Dube uthe ukholwa ukuthi njengosomabhizimusi kumele abelesandla esinikayo kumphakathi osekela ibhizimusi lakhe ngaso sonke isikhathi.
