uMthunywa
Cornelius Luphahla
UKUBULAWA kwamafasitela ngondofa elokitshini leNkulumane 5 koBulawayo sekubangele ukungazwani phakathi kwabomakhelwane nanko phela sebehlezi bekhombana ngeminwe yobuthakathi.
Kubikwa ondofa laba sebeqede amafasitela ezindlu ezintathu nanko phela bawatshaya nsukuzonke osokubangele ukuthi badele lokufaka amanye.
Ondofa laba kubikwa bake bahlupha nyakenye ngenyanga kaNkwenkwezi kodwa bama lanxa bephinde baqalisa futhi ezindlini lezi ezintathu ezilamakheli athi 1261, 1262 kanye lo 1263 ngenyanga kaMbimbitho.
Kuzwakale ukuthi ondofa laba noma nje sebeqalile ukutshaya kulezizindlu kodwa batshaya kakhulu indlu kaNkosazana Violet Ngutshana ku1263 osokudale ukuthi acabangele omakhelwane bakhe.
UMthunywa ukhulumisane loNkosazana Cynthia Nkomo ohlala kwenye indlu etshaywa amafasitela wachaza ukuthi okwenza bethi ngondofa yikuthi amatshe akhona atshaya amafasitela ayabe engakhanyi ukuthi avela ngaphi.
“Okwenza sikholwe ukuthi ngondofa abatshaya amafasitela ezindlu yikuthi amatshe atshayayo kawakhanyi ukuthi avela ngaphi. Uzwa ngokufa kwamafasitela kuthi kwesinye isikhathi amatshe abonakalayo athutsha evela phezulu ngakho umuntu ophilayo ngeke ame emoyeni ajike ilitshe,” kutsho uNkszn Nkomo.
Kuzwakale ukuthi ondofa laba nxa betshaya izindlu lezi batshaya ekuseni, emini kanye lantambama njalo sebebhoboze uphahla lweyinye yezindlu lezi.
Ekhuluma lentatheli uNkosazana Litha Moyo omunye wezakhamizi lezi ezitshayelwa izindlu uchaze ukuthi ulokudana okukhulu ngoba umakhelwane wakhe sesithi ngumntanakhe otshaya amafasitela akhe khona kungondofa.
“Mina ngibuhlungu ngoba umakhelwane wami sesithi umntanami nguye otshaya indlu yakhe ngamatshe khona kungondofa. Isimanga yikuthi amatshe la ayatshaya lendlini yami njalo kwesinye isikhathi atshaya sisonke lomntanami kanye lomakhelwane uMaNgutshana.
“Lokhu kusuka kungidanise ukuthi kungani ethi ngumntanami njengoba bonke omakhelwane bayake bezibonele amatshe ethutsha emoyeni. Ngokubona kwami okwenza athi ngumntanami yikuthi kimi akusatshayi sokutshaya kuye kuphela ngoba siyaphunga ngesiNtu,” kutsho uNkszn Moyo.
Ebuzwa ngale indaba uNkosazana Violet Ngutshana uchaze ukuthi sephelelwe ngamacebo ngenxa yokutshaywa kwendlu yakhe, seze evela emthethwandaba.
“Sengikhathele ngokutshaywa kwendlu yami sengizame amacebo wonke ngehluleka. Sengize ngivela emthethwandaba ngicabangela ukuthi mhlawumbe ngumntakamakhelwane otshaya indlu yami.
“Isimanga yikuthi ngithe ngifika endlini kwaqala njalo ukutshaya ngaze ngaphuma ngayahlala phandle lapho kwatshaya ngamandla. Ngemva kwalokho ngibuyele emapholiseni afika athi ngeke angisize ngalutho. Ngikhuluma nje indlu yami kayiselamafasitela lama-asbestos sebhoboke aphela du.
“Noma nje abantu bethi ondofa laba ngabami kodwa mina kangikwazi lokho, ngabe ngabami bengizakhuluma sibili ngoba sengikhathele. Ngike ngabaleka ngayahlala kwezinye indawo ngathi ngiphenduka ngathola sokutshaya ngamandla,” kutsho uNkszn Ngutshana.
UKhansila wakulelilokitshi uMnumzana Gideon Mangena ebuzwa ngale indaba uvumile ukuthi uyayazi njalo uke wazama ukuyilungisisa kodwa sivukile.
“Kuliqiniso sibili ukuthi kulezinto ezitshaya koMaNgutshana kodwa kumnyaka ophelileyo ngike ngaqoqa izakhamizi zalapha sabiza abantu ukuthi basincedise kwabangcono. Lapho kwakusatshaya izindlu ezintathu kodwa khathesi sokutshaya indlu eyodwa ngakho kunzima ukuthi ngidinge abantu yikho ngathi umninindlu azidingele abangamsiza,” kuphetha uMnu Mangena.
