uMthunywa
Intatheli kaMthunywa
BASELE bebambe owangaphansi omakorokoza beTuli ngemva kokuba omunye wabo ethole amathambo omuntu egcekeni ekhunjini lomfula ngesikhathi bedinga inkuni ngeviki ephelileyo.
Kubikwa uNkosazana Maudi Sebata labanye bakhe bafumane la mathambo ngesikhathi besiyadinga inkuni ekhunjini lomfula uTuli.
Ekhuluma lentatheli kaMthunywa uNkosazana Sebata uveze ukuthi lokhe elesithuli ngemva kokuthola amathambo omuntu ekhunjini lomfula uTuli.
“Sibelesithuli ngalokhu esikubonileyo emfuleni uTuli ngesikhathi sidinga inkuni ngoba besekuntambama sokumele sipheke sitshone sisemba ilanga lonke.
“Ngithe ngisithi mehlo suka ngabona amathambo esegcekeni okutshengisela ukuthi umuntu ubengcwatshiwe amanzi asekhukhula inhlabathi kwasala kusegcekeni, kukhanya amathambo ekhanda kuze kuyefika enyaweni.
“Sihle sathithibala labanye bami salahla lenkuni ebesilazo sayabikela abanye emadumbeni labo baskumela phezulu bayakhangela becabanga ukuthi mhlawumbe kasibonanga kuhle lakanye bathola kuyikho sibili ukuba ngamathambo omuntu sibili,” kulandisa uNkszn Sebata.
Omunye njalo obekhona ngesikhathi besemba uMnumuzana Abel Moyo uthe yena wethukile ngesiga lesi abahlangane laso njalo sokuhle kwabanzima lokuthi kuhlaleke kulindawo.
“Ngilapha ngethukile ngesiga esisehleleyo ngoba. Akusahlaleki lapha, akusasebenzeki ngoba umuntu ngumuntu ngeke sikukhangelele eceleni singathathi inyathelo ngoba amathambo nxa esegcekeni kubangela ukuthi lezulu lingani.
“Ngakho sihle sabikela amapholisa ngodaba lolu kodwa mina ngihle ngabaleka ngisesaba ukuthi njengoba ukukorokoza kungekho emthethweni funa lamapholisa basibophe,” kulandisa uMnu Moyo.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uthe uzaluphenyisisa ehofisini yalapho olwenzakalele khona.
“Udaba lwamathambo atholakale ekhunjini lomfula ngizaluphenyisisa ehofisini yalapho olwenzakalele khona kuphetha,” kuphetha uInsp. Ndebele.
