uMthunywa
Langelihle Moyo
BAQINISILE abadala nxa besithi ukutshelwa yikuncitshwa nanko phela bekuncane indawo kumcimbi yeNtwasa Arts Festival koBulawayo kusukela ngoLwesibili kuviki ephelileyo kwaze kwagoqwa ngoMgqibelo lapho okubuye kwehliswa izithukuthuku lizulu elinileyo.
ENational Art Gallery koBulawayo iNtwasa Arts Festival ibambisane leCimas Medical Aid, imbongi, lamaqembu ehlukeneyo agoqela i-Asante Mo le Iyasa ngaphansi kwesihloko esithi, “Akukaphuzi ukulwisa ukusetsheziswa kwezidakamizwa.
Imbongi zingene enkundleni zahaya ngobubi bokusetshenziswa kwezidakamizwa ngoba zingalungelanga imzimba kanye lempilakahle yengqondo.
Iqembu leNkululeko Yabatsha Arts (Iyasa) libukise ngomdlalo obufundisa ngobubi bokuthatha izidakamizwa, ezigoqela i-cocaine, imbanje, intshengu lokunye okunengi okudakayo.
Ntambama, batsho sebethelekile oMahlekisa sebezobulalisa uzulu ngembambo okuyikho abadume ngakho. Omahlekisa abangene enkundleni bagoqela uNtando Van Moyo, Q Dube, Chichi labanye abanengi.
UNtando Van Moyo uthe ujabule kakhulu ngendlela uzulu abuye ngayo ukuzobaxhasa njalo lokhu kutshengisa ukuthi izakhamizi zakoBulawayo ziyabathanda.
“Ngizwa ngilokujabula kakhulu ngendlela uzulu wakoBulawayo asitshengise ngayo uthando sigqiba iNtwasa Arts Festival koBulawayo njalo thina injongo yethu njengabo Mahlekisa ibiyikufundisa abesifazane okuthi bangafihli okunye abadlula phakathi kwakho ngoba lokhu kungabalimaza lakumpilakahle yabo yengqondo,” kuphetha uNtando Van Moyo.
