uMthunywa
Langelihle Moyo
ABATHENGISA imithi yezifuyo lezilimo abeFarm and City sebexwayise uzulu ngabangakukhangela nxa bethenga inkukhu zesitshebo ukuze bangathengi inkukhu ezigulayo.
UMnumzana Itai Shambambeva, oyingcitshi kwezempilakahle yezifuyo uxwayise abathengayo labathengisa inkukhu ngokumele bakukhangele nxa bethengisa lanxa bethenga inkukhu.
“Kuqakathekile ukuthi njengomfuyi ubekwazi ukuthi inkukhu zakho zibonakala njani nxa zingaphilanga kuhle. Ukuze ubone ukuthi inkukhu zakho azilamkhuhlane kumele unanzelele ukuthi insiba zigcwele umzimba wonke, amakhala awagelezi makhovula, amehlo lawo ayabona kuhle engelanyembezi lesisindo sihambelane lomhlobo kanye lokukhula kwenkukhu lombala wejwabu lenkukhu,” kuchasisa uMnu Shambambeva.
Ubuye walandisa ngokukhangelwayo nxa uthenga inkukhu.
“Nanzelelani ukubukeka kwayo inkukhu likhangele ijwabu lenkukhu umbala wayo kumele ungathi uba yi-pink. Kumele zikhanye zinonile.
“Ubuye waxwayisa abathengi ukuthi bakhona abanye abafuya inkukhu abacina bezipha amaphilisi ukuthi zibe nkulu loba lokhu kungeke kubonakale ngamehlo.
“Inkukhu eziphile kuhle ziyabonakala nxa zisidla lanxa zihamba ziyabe zigijima,” kulandisa uMnu Shambambeva
Uthe inkukhu elempilakahle ibonakala ngokudla lokunatha amanzi kanengi ngosuku.
“Inkukhu ephile kuhle ibonakala ngokudla lokunatha amanzi, lokhu kutshengisa impawu zokuthi inkukhu iphilile njalo ikhululekile,” kuphetha uMnu Shambambeva.