uMthunywa
Thokozile Mbedzi
ABALIMI kundawana zonke zelizwe bakhuthazwa ukuthi banike izifuyo zabo ukudla okule-phosphorus ngoba iyancedisa kumisebenzi yonke ebalulekileyo emzimbeni yazo.
I-phosphorus isetshenziswa ukwakha amathambo lamazinyo, iyancedisa ekukhuleni kwesifuyo njalo yenza sehlise.
Ekhuluma lentatheli kaMthunywa uLivestock Consultant uSimon Mlambo uthe abafuyi kabaqaphele ukuba banike izifuyo zabo ukudla okule-Phosphorous ngoba kuqakathekile ngesikhathi lesi.
“Abalimi kundawana zonke zelizwe kabanike izifuyo zabo ukudla okule-Phosphorous kungaba ngama-phosphorus licks kumbe ama-phosphorus blocks ngoba kuqakathekile ngesikhathi lesi.
“Utshani obuluhlaza obukhona khathesi kabulayo i-phosphorus edingakala kuzifuyo. Abafuyi kumele baqakathekise i-phosphorus ngoba ingeyinye yezakhi zomzimba ezidingakalayo emizimbeni yezifuyo ukuze zibe lempilakahle.
Uthe i-phosphorus le abafuyi balakho ukuyithola endaweni ezinengi kwabathengisa ama-supplement ezifuyo njalo lakulabo abayilungisayo kusiya ngalapho okuseduzane kumfuyi .
“Abafuyi bangaxhumana lama-technical advisor asendaweni okulungiswa khona i-phosphorus loba lapho okuthengiswa khona babelwe ulwazi ngokuthi bayisebenzisa njani.
“Ukuyafika kuma-technical advisor kuyancedisa ukuthi banikwe lezilinganiso okumele bazisebenzise nxa sebenika izifuyo zabo ngoba ziyatshiyana kusiya ngomhlobo wenkomo abalazo,” kuphetha uMnu Mlambo.